АҚШ Иран аумағындағы нысандарға жаңа соққылар жасай бастады

11 маусым 2026 07:27 Ардақ Құлтай

Сурет ЖИ көмегімен жасалған

АҚШ-тың Орталық қолбасшылығы (CENTCOM) Иран аумағындағы бірнеше нысанға соққы жасай бастағанын мәлімдеді, деп хабарлайды Orda.kz.

Қолбасшылықтың хабарлауынша, операция АҚШ президенті әрі Қарулы күштердің бас қолбасшысы Дональд Трамптың бұйрығымен жүргізіліп жатыр. CENTCOM бұл әрекетті «өзін-өзі қорғау мақсатында жасалған соққылар» деп сипаттады.

«Бұл соққылар Иранның негізсіз әрі жалғасып жатқан агрессиясына жауап ретінде жүзеге асырылуда», делінген ресми мәлімдемеде.

Axios басылымының жазуынша, Вашингтон жаңа шабуылдар арқылы Тегеранға қысым жасап, оны келісімге қол қоюға мәжбүрлеуді көздейді. Алайда сарапшылар бұл қадам өңірдегі әскери қақтығыстың одан әрі ушығу қаупін арттыратынын ескертеді.

@ordaqazaqs
Дональд Трамптың Тегеранды келіссөзді созбаққа салды деп айыптауынан кейін АҚШ Иранға жаңа әскери соққы жасады. Операция барысында 49 Tomahawk қанатты зымыраны қолданылып, елдің оңтүстігіндегі әуе қорғанысы, радиолокация және дрондарды басқару орталықтары нысанаға алынды. Бұған жауап ретінде Иран Кувейт, Бахрейн, Ирак және Иорданияда орналасқан АҚШ-тың 18 әскери базасына зымырандар мен дрондар арқылы қарсы шабуыл жасады. Сондай-ақ Тегеран Ормуз бұғазын сауда кемелері үшін жауып, шектеуді бұзбақ болған екі коммерциялық кемеге соққы бергенін мәлімдеді. Алайда АҚШ қолбасшылығы бұғаздағы қозғалыс қалыпты режимде жалғасып жатқанын алға тартты. Вашингтонның басты мақсаты – Иранды келісімге келуге мәжбүрлеу. Әзірге адам шығыны мен қираған нысандар туралы нақты ақпарат жоқ.
♬ оригинальный звук - ORDA - ORDA

АҚШ шенеуніктері Ираннан жауап соққылар болуы мүмкін екенін айтып отыр. Олардың болжамынша, Тегеран бұған дейінгі сияқты америкалық әскери базаларды нысанаға алуы ықтимал.

Ал Иранның Tasnim агенттігі әскери дереккөзге сілтеме жасап, АҚШ әрекетіне «қатаң жауап қайтарылатынын» хабарлады.

Бұған дейін Иран президенті Дональд Трамптың қоқан-лоққылары АҚШ-тың күшін емес, «шарасыздығын» көрсететінін мәлімдеген болатын.

АҚШ президенті сондай-ақ Израильдің Иранға жасалып жатқан қазіргі шабуылдарға қатысы жоқ екенін мәлімдеді. Ол бұл туралы Fox News арнасына берген сұхбатында айтып, Израиль тарапы аталған шабуылдарға қатыспағанын жеткізді. Президенттің сөзінше, Израиль бұл операцияларға араласпаған.

Еске салайық, сейсенбіде АҚШ әскері америкалық тікұшақтың атып түсірілуіне жауап ретінде Иранның радиолокациялық станциялары мен әуе қорғанысы жүйелеріне соққы жасаған еді. Кейін Иран америкалық базаларға шектеулі көлемде зымырандар мен дрондар ұшырған.

Оқи отырыңыз:

ақш иран

Жаңалықтар

барлық жаңалықтар