Ақ үйде атыс шығарған күдікті өмір бойы бас бостандығынан айырылуы мүмкін

Трамп қатысқан кеште атыс шығарған күдіктіге өмір бойы бас бостандығынан айыру жазасы кесілуі мүмкін. Вашингтонда федералдық сот Ақ үй тілшілері қауымдастығының кешкі асындағы атысқа күдікті Коул Алленге айып тақты, деп хабарлайды  Orda.kz BBC-ге сілтеме жасап.

Оған АҚШ президентіне қастандық жасауға әрекеттену, зорлық-зомбылық қылмысы кезінде атыс қаруын қолдану және ауыр қылмыс жасау мақсатында қаруды штаттар арасында тасымалдау айыптары тағылып отыр.

АҚШ заңнамасына сәйкес, егер ол кінәлі деп танылса, өмір бойы бас бостандығынан айырылуы мүмкін.

Прокуратура мәліметінше, күдікті президентке шабуыл жасауды жоспарлап, бірнеше штат аумағын кесіп өткен. Оның жанынан 12-калибрлі помпалы мылтық, пышақтар және басқа да қару түрлері табылған.

Бұлтартпау шарасы бойынша сот отырысы бейсенбіге, ал алдын ала тыңдау 11 мамырға белгіленген.

Аллен әзірге өзіне тағылған айыптарды мойындайтыны немесе мойындамайтыны туралы пікір білдірген жоқ. Белгілі болғандай, Калифорниядан шыққан 31 жастағы мұғалім бұрын қылмыстық жауапкершілікке тартылмаған.

Еске салсақ, атыс 26 сәуірге қараған түні Washington Hilton қонақүйінде өтті. Онда Ақ үй тілшілері қауымдастығының жыл сайынғы кешкі асы ұйымдастырылып, оған Дональд Трамп және басқа да жоғары лауазымды тұлғалар қатысқан.

Шабуылшы мылтық, тапанша және пышақпен қаруланған. Ол залға кіреберісте ұсталды. Алдын ала мәлімет бойынша, ол жалғыз әрекет еткен және Вашингтонға алдын ала келіп, іс-шара өткен қонақүйде бірнеше күн тұрған.

Оқи отырыңыз:

• «Мені көздеген болуы мүмкін» — Трамп өзі қатысқан іс-шарадағы атыс туралы мәлімдеме жасады
• Трампқа оқ атқан «үздік мұғалім» болып шықты
• Трамп қатысқан Ақ үй тілшілері қауымдастығының кешкі асында атыс болды
• Трампқа қастандық жасамақ болған ұстаздың манифесі жарияланды