Air Astana-дағы миллиардтық ұрлық: Апелляция үкімді өзгертпеді

Алматы қалалық сотының қылмыстық істер жөніндегі апелляциялық алқасы «Air Astana» АҚ - да 1 миллиард теңгеден астам қаражатты жымқыру және қылмыстық кірістерді заңдастыру туралы қоғамдық резонанс тудырған іс бойынша үкімді өзгеріссіз қалдырды, деп хабарлайды Orda.kz.       
 

Бас көлік прокуратурасының мәліметінше, қылмысты ұйымдастырған адам 9 жылға, ал оның екі сыбайласы 8 жыл 6 айға бас бостандығынан айырылды. Сондай-ақ барлық сотталғандардың мүлкі тәркіленіп, оларға 5 жыл мерзімге коммерциялық ұйымдарда лауазымды қызметтерді атқаруға тыйым салынды.

Сот жәбірленуші тараптың 1 миллиард теңгеден астам қаражатқа берген азаматтық талап-арызын қанағаттандырды. Тәркіленген мүлік келтірілген шығынды өтеуге бағытталады.
 
Апелляциялық инстанция қорғаушы тараптың уәждерін қарап шығып, үкімді өзгеріссіз, ал шағымдарды қанағаттандырусыз қалдырды.

Еске салсақ, ұрлық жайлы алғашқы ақпарат екі жыл бұрын пайда болды. 2024 жылғы 4 желтоқсанда Казнетте Air Astana-да ірі көлемдегі қаражат жымқыру деректері туралы ақпарат тарады. Сол күні Air Astana ресми пікір білдіріп, ұрлықтың расымен болғанын растады.

Аудитті «Ernst & Young — кеңес беру қызметтер» ЖШС жүргізген. 2024 жылғы 17 қазанда ұсынылған  есепте 1 054 710 181  теңге көлеміндегі ұрлық фактілері расталған. Осыған байланысты «Air Astana» АҚ Алматы қаласы бойынша Экономикалық тергеп-тексеру департаментіне (ЭТД) сотқа дейінгі тергеу жүргізу туралы өтініш білдірді.

Оқи отырыңыз:

• Питер Фостердің кетуінің себебі компаниядағы ұрлыққа қатысты ма?
• Air Astana Дубайға ұшатын барлық рейсін тоқтатты
• Иран Таяу Шығыстағы АҚШ-тың радарлары мен ұшақтарына соққы жасады