Абай облысындағы жол апатынан ТЖД қызметкерлері қаза тапты

Абай облысында көліктердің бетпе-бет соғылуы салдарынан төрт адам қаза тапты. Қайғылы жол апаты Семей – Курчатов тасжолында болған. Облыстық Төтенше жағдайлар департаменті қаза тапқандардың арасында ведомство қызметкерлері де бар екенін мәлімдеді, деп хабарлайды Orda.kz.     

Абай облысының Төтенше жағдайлар департаменті төрт адамның өмірін қиған жол апатына қатысты түсініктеме берді. Қаза болғандардың екеуі департамент қызметкерлері екені анықталды.

«2026 жылғы 26 тамызда сағат 15:30 шамасында департаментке жол-көлік оқиғасы туралы ақпарат келіп түсті. Оқиға салдарынан төрт адам қаза тапты. Олардың екеуі – Абай облысы ТЖД қызметкерлері. Ведомствоның жеке құрамы мен басшылығы қаза болғандардың отбасыларына, туған-туыстары мен жақындарына шын жүректен көңіл айтады. Бұл ауыр қайғы әрі орны толмас қаза»,  деп хабарлады облыстық ТЖД. 

Ведомство қаза болған қызметкерлердің отбасыларына барлық қажетті көмек пен қолдау көрсетіліп жатқанын және бұл жұмыс жалғаса беретінін атап өтті.

Қазіргі уақытта оқиғаға байланысты қызметтік тергеу басталды. Оның қорытындысы бойынша лауазымды тұлғалардың әрекетіне нақты баға беріледі.

Chevrolet Nexia және Kia Rio маркалы екі көлік бір-біріне қарсы келген. Жол апаты Семей – Курчатов тасжолының 35-шақырымында болған.

Оқи отырыңыз:

• Анасын қорғаймын деп жанын қиды: Жітіқарада 15 жастағы баланы өлтірген өгей әкеге үкім шықты
• ҚР СІМ: Непал мен Қытайдағы су тасқынынан зардап шеккен қазақстандықтар жоқ