«75 ісі»: Қамшыбек Тәшиевке тоғыз жыл түрме жазасы сұралды

Қырғызстанның Бірінші Май аудандық сотында бұрынғы Ұлттық қауіпсіздік мемлекеттік комитетінің (ҰҚМК) төрағасы Қамшыбек Тәшиевке қатысты «75 ісі» деп аталған қылмыстық іс қаралып жатыр, деп хабарлайды Orda.kz.

Тәшиев пен басқа айыпталушыларға тоғыз жыл сұралды.

Айыпталушылар қатарында сондай-ақ Қырғызстанның бұрынғы бас прокуроры Құрманқұл Зұлушев, бұрынғы парламент спикері Нұрланбек Тұрғынбек уулу және басқа да тұлғалар бар.

Kaktus.media басылымының жазуынша, соттағы жарыссөз барысында мемлекеттік айыптаушылар барлық айыпталушыға тоғыз жылдан бас бостандығынан айыру жазасын тағайындауды сұрады.

Қазіргі уақытта сотта тараптардың жарыссөзі жалғасып жатыр. Айыпталушылардың адвокаттары өз ұстанымдарын білдіруде.

Адвокат Икрамидин Айтқұлов 24.kg басылымына берген мәліметінде сот отырысы кезінде Қамшыбек Тәшиев мемлекеттік айыптаушыларға тағылған айыптан бас тартуды ұсынғанын айтты. Адвокаттар бұл ұсынысты қолдағанымен, прокуратура өкілдері оған ешқандай жауап бермеген.

Қамшыбек Тәшиевке қандай айып тағылған?

Бұған дейін адвокат Икрамидин Айтқұлов Қамшыбек Тәшиевке Қырғыз Республикасы Қылмыстық кодексінің «Билікті күшпен басып алу немесе ұстап тұру, сондай-ақ конституциялық құрылысты күшпен өзгертуге бағытталған әрекеттер» және «Қызметтік өкілеттігін асыра пайдалану» баптары бойынша айып тағылғанын хабарлаған.

Еске салсақ, биыл ақпан айында Қырғызстанның 75 азаматы президент Садыр Жапаров пен Жогорку Кеңеш төрағасына мерзімінен бұрын президент сайлауын өткізуді талап еткен үндеу жолдағаны белгілі болды.

10 ақпанда Садыр Жапаров өзінің жақын серігі әрі досы Қамшыбек Тәшиевті барлық қызметінен босатты. Қырғызстан президентінің баспасөз қызметінің мәліметінше, бұл шешімнің негізгі мақсаты – мемлекеттік бірлікті нығайту және қоғамда, оның ішінде мемлекеттік құрылымдар арасында жікке бөлінудің алдын алу болған.

Президенттің баспасөз хатшысының айтуынша, Қамшыбек Тәшиевтің жақын ортасындағы адамдар депутаттарға хабарласып, оларды «генералдың жағына шығуға» және «жаңа президент сайлауын бастамашылық етуге» үгіттеген.

Оқи отырыңыз:

Мүфтият мәһрдің ең төменгі мөлшерін түсіндірді

Түркістан облысында жол апатынан бір отбасының бес баласы қаза болды