71 млн теңгелік пәтер: Алмасбек Садырбай ісінде жаңа деректер шықты

Қонаев қаласында 1,2 миллиард теңге жымқырды деген күдікке ілінген қоғам белсендісі әрі сарапшы Алмасбек Садырбайға қатысты кезекті сот отырысы өтіп жатыр. Сот отырысында прокурорлар айыптау актісін оқыды. Бұған Алмасбек ойдан құралған деп тағылған айыппен келіспейтінін айтты, деп хабарлайды Orda.kz.

Еске салсақ, Алмасбек Садырбай 2024 жылғы 6 қарашада аса ірі көлемдегі қаржы жымқыру ісі бойынша қамауға алынған болатын. Іс бойынша тергеу мен сот процесі бір жыл сегіз айдан бері жалғасып келеді.

Сот отырысы барысында судья Нұрсұлтан Қойшыбаев БАҚ өкілдеріне ұялы телефон арқылы видео түсіруге тыйым салды. Оның айтуынша, сот процесін тек кәсіби камера көмегімен ғана таспалауға рұқсат етіледі.

Алмасбек Садырбайға Қылмыстық кодекстің бірден үш бабы бойынша айып тағылған.

Атап айтқанда:
— ҚК-нің 190-бабы — алаяқтық;
— 262-бабы — ұйымдасқан қылмыстық топты немесе қылмыстық ұйымды құру және оған басшылық ету, сондай-ақ оған қатысу;
— 218-бабы — қылмыстық жолмен алынған ақша мен өзге де мүлікті заңдастыру.

Сот барысында мемлекеттік айыптаушы Қазақстан Республикасы Жоғарғы Сотының алаяқтық істері бойынша сот практикасына қатысты 2017 жылғы 29 маусымдағы №6 нормативтік қаулысына сілтеме жасады.

Аталған қаулыға сәйкес, бөтен мүлік кінәлі адамның немесе басқа тұлғалардың иелігіне заңсыз өтіп, олар сол мүлікке иелік ету, пайдалану және өз қалауынша билік ету мүмкіндігіне нақты түрде ие болған сәттен бастап алаяқтық аяқталған қылмыс болып есептеледі.

Егер алаяқтық бөтен мүлікке құқық алуға бағытталған түрде жасалса, онда қылмыс кінәлі тұлғада сол мүлікке өз мүлкіндей иелік етуге, пайдалануға және билік етуге заң жүзінде бекітілген мүмкіндік пайда болған сәттен бастап аяқталған болып саналады. Бұл құқық тиісті рәсімдеу, куәландыру немесе тіркеуден кейін туындайды.

Айыптау актісінде көрсетілгендей, Садырбайдың бақылауындағы компаниясының есепшотына субсидия түрінде түскен қаражаттан бірнеше қаржылық аударым жасалған. Тергеу мәліметінше, бұл қаражат нақты жұмыс орындалмай, қызмет көрсетілмей және тауар жеткізілмей аударылған.

Кейін аталған қаражат Садырбайға қатысы бар адамдардың есепшоттарына жалақы және аванс ретінде жіберілгені айтылды. Бұдан соң бұл ақшаға мүлік сатып алынған.

Сондай-ақ, айыптау тарабының мәліметінше, заң бойынша қудалануы мүмкін екенін түсінген күдіктілер қылмыстық жолмен алынған мүліктің шынайы сипатын жасыру мақсатында бұл активтерді «Творчество Консалтинг» компаниясына инвестициялау туралы шешім қабылдаған. 

Атап айтқанда:
— 2022 жылғы 24 қаңтарда «ПК Зинька Баба» арқылы 32 млн теңге көлемінде қызмет көрсету жөніндегі келісімшарт бойынша төлем жүргізілген;
— 2022 жылғы 31 наурызда «ПК Жан-Нур Андро» арқылы Bereke Bank есепшотына қаражат аударылған.

Садырбай прокурор құрамының сот процесі кезінде себепсіз ауыспауын және іске тұрақты қатысуын талап етті. Өз әрекеттерін түсіндіре келе, ол ешқандай заң бұзушылық жасамағанын, ал жүргізген жұмыстары Қазақстанның агроөнеркәсіп кешенін қолдау мен дамытуға бағытталғанын айтты.

Алмасбек Садырбайдың қорғаушысы Анар Құсайынова соттан бұлтартпау шарасын жоюды талап етіп, Садырбайды дереу босатуды сұраған еді. Қорғау тарабының пікірінше, ол қамауда заңсыз ұсталып отыр.

Сот шешімімен жеке шағым қараусыз қалдырылып, бұлтартпау шарасы – қамауда ұстау өзгеріссіз қалды.

Адвокат бұған дейін Жоғарғы сотқа бейнеүндеу жасап, Қонаев қалалық сотында бірқатар процессуалдық заңбұзушылықтар болғанын айтқан. Оның дерегінше, тергеу соты санкциялаған қамау мерзімі 2026 жылдың наурызында аяқталған.

Қорғау тарабы сондай-ақ істі сотқа жолдау мен сот қаулысының күні арасында сәйкессіздік барын алға тартқан. Алайда апелляциялық алқа бұл уәждерді негізсіз деп танып, Садырбайды тергеу изоляторында қалдыру туралы шешімді күшінде қалдырды.

Оқи отырыңыз:

• Қостанай облысында 14 жастағы жасөспірім бәстесіп суға секіріп, қаза тапты
• Ұрлықтың алдын алу шарасы күшейтілді: Фермерлерге арналған жағармай үш түске боялды