600 миллион теңгеге жөнделген Шнайдер көпірінің қирауы: ШҚО әкімі пікір білдірді

Шығыс Қазақстан облысының әкімі жолаушылар көлігі және автомобиль жолдары басқармасы басшысының ұсталуына қатысты пікір білдірді, деп хабарлайды Orda.kz.      

Шығыс Қазақстан облысының әкімі Нұрымбет Сақтағанов облыстық жолаушылар көлігі және автомобиль жолдары басқармасының басшысының ұсталуына байланысты түсініктеме берді.

Нұрымбет Сақтағановтың айтуынша, өңірдегі жол саласына қатысты тексеріс жүргізуге Өскемен қаласындағы Шнайдер көпірінің опырылып құлауы себеп болған.

Аталған оқиға өткен жылдың 1 қыркүйегінде автомобиль өткелінде болған. Бұған дейін бұл нысанды жөндеуге бюджет қаражатынан бірнеше рет қаржы бөлінген болатын.

Оқиғадан кейін облыс әкімі құқық қорғау органдары басшыларының қатысуымен кеңес өткізіп, автомобиль жолдары мен көлік саласына кешенді тексеру жүргізуді, әсіресе сыбайлас жемқорлық тәуекелдерін анықтауға басымдық беруді тапсырды.

Сақтағановтың сөзінше, тексеру барысында сол кездегі ШҚО жолаушылар көлігі және автомобиль жолдары басқармасының басшысы Данияр Уахитов тарапынан сыбайлас жемқорлық сипатындағы заңбұзушылықтар анықталған.

«Мен оны сол кезде-ақ сот шешімін күтпей бірден қызметтен босаттым. Қазір онымен құқық қорғау органдары айналысып жатыр. 13 жыл бірге жұмыс істегенімізді ескерсек, оның әрекеті мен үшін күтпеген жағдай болды. Ол менің сенімімді ақтамады» деп жазды әкім Instagram әлеуметтік желісіндегі ресми парақшасында. 

Сондай-ақ журналистермен әңгіме барысында Нұрымбет Сақтағанов өңірде сыбайлас жемқорлыққа қатысты қатаң ұстаным бар екенін атап өтті. Оның айтуынша, «жеке қалтасының қамын мемлекет мүддесінен жоғары қоятындармен әңгіме қысқа, әрі жол екіге айырылады».

Еске салсақ, Шнайдер көпірі 1978 жылы салынған, соңғы екі жылда осымен екінші мәрте апат болып тұр. Қалада Үлбі арқылы өтетін бар болғаны үш көпір бар, сондықтан бұл жағдай көлік қозғалысына айтарлықтай әсер етеді. 

Былтыр Өскеменде 1 қыркүйекте Үлбі өзені арқылы өтетін Шнайдер көпірі қирап, қақ айырылып қалды.  Абырой болғанда, зардап шеккендер жоқ. Бұл жағдай қала тұрғындарының ашу-ызасын тудырды, оның себебі көпір 2023 жылдың қарашасынан 2024 жылдың наурызына дейін күрделі жөндеуге жабылды. Жөндеуге бюджеттен 600 миллион теңгеден астам қаржы жұмсалған.

Өңірге қатысты соңғы жаңалықтарды ұсынамыз: 

• ШҚО-да тағы бір мерзімді әскери қызметші қаза тапты
• ШҚО-да дәл Рождество күні бірнеше адамның өлімі тіркелген
• Үкіметтегі галстуксіз жиын ШҚО дамуына арналды