Үкіметтегі галстуксіз жиын ШҚО дамуына арналды

ҚР Премьер-Министрі Әлихан Смайылов Марқакөл және Қатонқарағай аудандарын қалпына келтіруді тапсырды.

ҚР Премьер-Министрі Әлихан Смайылов Марқакөл және Қатонқарағай аудандарын қалпына келтіруді тапсырды, деп хабарлады үкіметтің баспасөз қызметіне сілтеме жасап Orda.kz.

«Мүдделі мемлекеттік органдарға Марқакөл және Қатонқарағай аудандарын қалпына келтіру жұмыстарын қамтамасыз етуді тапсырамын. Әкімдікпен бірлесіп, барлық тапсырмаларды уақтылы және сапалы орындау үшін ведомствоаралық өзара іс-қимылды күшейту қажет», - деді Премьер-Министр кездесуде.

Жиынға қатысушылар «Алтай» көтерме сауда орталығын, Риддер қаласындағы емханасы бар көпсалалы аурухана кешенін салу мәселелерін де талқылады.

Отырыста Қандысу және Үйдене су қоймаларын, сондай-ақ облыстағы суармалы жерлердегі шаруашылық аралық және шаруашылық ішілік каналдарды қалпына келтіру мәселелері бөлек талқыланды.

Сондай-ақ Бұқтырма су қоймасы арқылы көпір салу, республикалық және жергілікті маңызы бар автомобиль жолдарына жөндеу жұмыстарын жүргізу, жол инфрақұрылымын туристік нысандармен байланыстыру мәселелері қаралды» делінген хабарламада.

Сонымен қатар, тау-кен металлургия кешеніне инвесторлар тарту, жұмыс істеп тұрған су электр станцияларын жетілдіру және жаңа шағын станциялар салу, жылу көздеріндегі жөндеу жұмыстары барысын бақылауды қамтамасыз ету және басқа да бірқатар мәселелер көтерілді.

Әлихан Смайылов жалпы республикаға көптеген су қоймаларын қайта жаңғырту қажет екенін, сондықтан бұл жұмыстарды кезең-кезеңімен жүргізу керектігін атап өтті.