2026 жылы еліміздің қай жолдары жөндеу көретіні белгілі болды

2026 жылы көлік министрлігі автожол саласында e-Joldar бірыңғай цифрлық жүйесін пайдалануға енгізуді жоспарлап отыр, деп хабарлайды Orda.kz.       

2026 жылы Қазақстанда жол жұмыстарының барлық түрімен шамамен 11 мың шақырым автомобиль жолын қамту көзделіп отыр. Бұл туралы ҚР Көлік вице-министрі Мақсат Қалиақпаров мәлімдеді.

Атап айтар болсақ:

• 2300 шақырым жолдың  құрылысы және қайта жаңғырту;
• 5000 шақырым жол  күрделі және орташа жөндеуден өтеді;
• шамамен 4000 шақырым жолдың  жергілікті бағыттағы желісін дамыту.

Басым жобалардың қатарында ірі автожол бағыттарының құрылысы мен реконструкциясын жалғастыру бар. Ұлытау облысы аумағындағы ұзындығы 208 шақырым болатын Қызылорда – Жезқазған автожолындағы жұмыстар жалғасады.

Жалпы ұзындығы 896 шақырым болатын «Орталық – Батыс» жобасын іске асыру, сондай-ақ Ақтөбе – Ұлғайсын (232 шақырым) және Қарағанды – Жезқазған (572 шақырым) бағыттары бойынша жобаларды жүзеге асыру жоспарланған.

«2026 жылы бірқатар ірі жобаларды іске асыру көзделіп отыр. Бұл еліміздің транзиттік-көлік әлеуетін дамытуға бағытталған. Ауқымды жобалар қатарында «Ақтөбе – Ұлғайсын» , «Қарағанды – Жезқазған», «Бейнеу – Сексеуіл» және аса маңызды негізгі жоба – «Орталық – Батыс»  жолы бар», – деді Мақсат Қалиақпаров. 

Сонымен қатар ірі елді мекендерді айналып өтетін жолдардың құрылысы мен қайта жаңғыртуына ерекше көңіл бөлінеді. Атап айтқанда, Сарыағаш, Қызылорда, Петропавл және Рудный қалаларын айналып өтетін жолдарда жұмыс жүргізіледі.

Туристік және шекара маңы бағыттарын дамыту да жалғасады, оның ішінде Рахман қайнарларына апаратын жол, сондай-ақ Петропавл – Ресей Федерациясының шекарасы учаскесі бар.

2026 жылы күрделі және орташа жөндеу шеңберінде келесі автожолдарда жұмыстар жоспарланған:

• Жезқазған – Петропавл,
• Атырау – Орал,
• Жаңаөзен – Кендірлі,
• Мұқыр – Құлсары,
• Макинск – Ақсу – Торғай.
• Жергілікті жол желісі бойынша Ақтау – Форт-Шевченко, Түркістан – Шәуілдір, Шапай – Сайқын бағыттарындағы жобаларды іске асыру, сондай-ақ Семей қаласындағы автогужевой көпірдің құрылысын жалғастыру көзделген.

Сонымен қатар заманауи цифрлық және технологиялық шешімдерді енгізу жұмыстары қатар жүргізілуде. Қазіргі уақытта автомобиль жолдарында 71 автоматтандырылған өлшеу станциясы орнатылған, оның ішінде 38-і республикалық маңызы бар жолдарда, 33-і жергілікті жол желісінде орналасқан. Алдағы уақытта олардың санын 220-ға дейін арттыру жоспарланып отыр.

Бұдан бөлек, 2026–2027 жылдары 33 өткізу пунктін толық жаңғырту жоспарланған. Ал олардың өткізу қабілетін 35 млн тоннаға дейін арттыра отырып, реконструкциялау жұмыстарын 2030 жылға дейін толық аяқтау көзделіп отыр.

Сондай-ақ 2026 жылы автожол саласында e-Joldar бірыңғай цифрлық жүйесін пайдалануға беру жоспарланған. Бұл жүйенің негізгі мақсаты – эталондық деректерді шоғырландыру және олардың қоғамдық бақылау үшін ашықтығын қамтамасыз ету.

 
Еске салсақ, соңғы бес жылда Қазақстанда жолдарды жөндеу мен салуға 6 триллионнан астам теңге жұмсалғанымен, олардың сапасы тұрғындардың көңілінен шықпайды.

Тақырыпқа сай ұсынамыз:

Қазақстандағы кейбір жолдар 20 жыл бойы жөндеу көрмеген

Жол жөндеуде ақша жымқырыла ма? Көлік министрі Қарабаев жауап берді

Жамбылда 7,5 млрд теңгелік жол жобасы тоқтап қалды

«Бұлай болмайды!»: Сатыбалды Алматыдағы құрылыстың тоқтап тұрғанына ашуланды

БҚО-да 200 миллион теңгеге салынған жол қирап жатыр