2026 жылғы 1 маусымнан бастап Қазақстанда не өзгереді?

2026 жылғы маусымда қазақстандықтарды қарқынды жұмыс айы күтіп тұр. Бұл айда мемлекеттік мерекелер мүлде жоқ, сәйкесінше жұмыс күндерінде қосымша демалыстар да болмайды. Бес күндік жұмыс аптасы сақталған жағдайда 22 жұмыс күні және 8 демалыс күні болады, деп хабарлайды Orda.kz.

Жаздың алғашқы айы қазақстандықтарға тағы қандай жаңалықтар мен өзгерістер әкеледі? Маңызды ақпараттарды жинақтап ұсынамыз.

 Базалық мөлшерлеме өзгеруі мүмкін

Ұлттық банк базалық мөлшерлеме бойынша шешімді 5 маусымда қабылдайды. Еске салайық, 2026 жылғы 24 сәуірдегі соңғы отырыста қаржы реттеуші көрсеткішті 18% деңгейінде қалдырған еді. Бұл жолы мөлшерлемені төмендету мүмкіндігі қарастырылып отыр.

Жинақ ақшаны көбейту үшін қазақстандықтарға қандай қаржылық жоспар тиімді екені туралы бөлек материалда айтылады.

 2000 және 10 000 теңгелік банкноттар айналымнан шығады

2 000 теңгелік банкноттың параллель айналым кезеңі 2026 жылғы 24 маусымда аяқталады. Ал 10 000 теңгелік купюраның мерзімі 27 маусымда бітеді. Дегенмен Ұлттық банк 10 000 теңгелік банкнот бойынша мерзімді ұзарту мүмкіндігін қарастырып отыр, себебі ол халық пен бизнес арасында кең таралған. Екі номиналдың бір уақытта айналымнан шығуы банк жүйесіне қосымша жүктеме түсіруі ықтимал.

Алайда айналым кезеңі аяқталғаннан кейін де купюраларды айырбастауға болады. Барлық коммерциялық банктер мен «Қазпошта» АҚ ескі банкноттарды тағы үш жыл бойы қабылдайды. Ұлттық банк филиалдары оларды мерзімсіз ауыстырады. Толығырақ ақпарат бөлек материалда берілген.

 
«Алматы Жастары» бағдарламасына өтінім қабылдау басталады

1–15 маусым аралығында «Алматы Жастары» бағдарламасы аясында жеңілдетілген тұрғын үй несиелеріне өтінімдер қабылданады. Құжаттарды kezekte.kz сайтындағы «Тұрғын үй сервистері» бөлімінде тапсыруға болады.

Бағдарлама шарттары:

• несие сомасы — 20 млн теңгеге дейін;
• пайыздық мөлшерлеме — 5%;
• бастапқы жарна — 10%;
• бастапқы және қайталама тұрғын үй сатып алу мүмкіндігі.

Негізгі талаптар:

жасы 35 жасқа дейін (қоса алғанда);
Алматыда кемінде 1 жыл тұрақты тіркеу;
соңғы 5 жылда үміткердің және отбасы мүшелерінің атында тұрғын үй болмауы;
Алматыда кемінде 6 ай еңбек өтілі және міндетті зейнетақы аударымдарының болуы.
 
Жаңа әуе рейстері ашылады

1 маусымнан бастап SCAT әуе компаниясы Шымкент – Санкт-Петербург бағыты бойынша ұшуларды бастайды. Алғашында аптасына екі рейс — дүйсенбі және жұма күндері орындалады.

3 маусымнан бастап «Россия» әуе компаниясы Астана – Санкт-Петербург тікелей рейстерін қайта іске қосады. Жазғы кесте бойынша аптасына үш рет ұшады:

Астанадан — дүйсенбі, бейсенбі, сенбі;
Санкт-Петербургтен — сейсенбі, жұма, жексенбі.
 
Қазақстанда Cirque du Soleil өнер көрсетеді

Атақты канадалық Cirque du Soleil циркі Қазақстанға қайта оралады. Маусым айында көрермендерге OVO шоуы ұсынылады. Бұл — жәндіктер әлемі туралы акробатика, тірі музыка және күрделі визуалды эффектілерге негізделген қойылым.

Гастрольдер екі қалада өтеді:

4–7 маусым — Астана, «Барыс Арена»;
11–15 маусым — Алматы, «Алматы Арена».
Әр қалада жеті қойылым жоспарланған: төрт кешкі, екі күндізгі және бір таңғы шоу.

Алматыға әлемдік деңгейдегі спикерлер келеді

11–13 маусым аралығында Алматыда New Vision Forum өтеді. Бизнес-форумға Еуропалық комиссияның бұрынғы басшысы және Португалияның экс-премьері Жозе Мануэл Баррозу, Apple компаниясының Siri дауыстық көмекшісін жасаушылардың бірі Люк Джулия, «Ерлер Марстан, әйелдер Венерадан» кітабының авторы Джон Грей және басқа да әлемдік деңгейдегі спикерлер қатысады.

27 маусымда Первомай тоғандарында халықаралық әртістер қатысатын Satisfaction Fest электронды музыка фестивалі өтеді. Ал 28 маусымда «Спартак» стадионында әйгілі Megadeth тобының концерті жоспарланған.

 Әлем жаңалықтары

Классикалық Sega қайта сатылымға шығады. 1 маусымда 40926 Sega Genesis Console жинағы сатылымға шығады. Бұл — культтік 16-биттік приставканың дәл көшірмесі. Жинаққа консоль моделі, екі ажыратылатын контроллер және Sonic The Hedgehog ойыны бар декоративті картридж кіреді. Бағасы шамамен 17 000 теңге болады.

 Apple WWDC 2026 конференциясы

8–12 маусым аралығында Apple компаниясының жыл сайынғы Worldwide Developers Conference өтеді. Негізгі назар жаңа операциялық жүйелер мен жасанды интеллект шешімдеріне бағытталмақ. Іс-шара көбіне онлайн форматта ұйымдастырылады.

Кино жаңалықтары

Маусым айында кинотеатрларда бірнеше ірі премьера күтіледі.

5 маусым — «Очень страшное кино» франшизасының алтыншы бөлімі прокатқа шығады.
19 маусым — «История игрушек 5» анимациялық фильмі көрерменге жол тартады.
22 маусым — DC Studios түсірген «Супергерл» фильмі премьерасы өтеді. Басты рөлде австралиялық актриса Милли Олкок.

Оқи отырыңыз: 

Айдағы мобильді үй, электр жарығы, интернет: NASA адамзаттың алғашқы 30 күндік үйін салып жатыр

Астана маңындағы ауылдағы көкпар жаттығуы оқушы өлімімен аяқталды