20 адам зардап шегіп, 45 млн теңгеден астам шығын келтірген алаяқ әйел сотталды

Степногорск қаласының прокуратурасы ірі мөлшерде бірнеше рет алаяқтық жасағаны үшін айыпталған қала тұрғынына қатысты қылмыстық іс бойынша мемлекеттік айыптауды қолдады, деп хабарлайды Orda.kz.

Тергеу барысында 2023-2024 жылдары сотталған әйел пайдакүнемдік ниетпен, азаматтардың сенімін теріс пайдаланып және алдау арқылы оларға тұрғын үй сатып алуға көмектесуді ұсынғаны анықталды.

Алайда оның өзіне алған міндеттемелерін орындауға ниеті де, нақты мүмкіндігі де болмаған. Соған қарамастан, ол азаматтардан ақша алып, оны жеке мақсаттарына жұмсаған.

Әйелдің қылмыстық әрекеттерінен 20 азамат зардап шегіп, оларға жалпы сомасы 45 млн теңгеден астам материалдық шығын келтірілген.

Сот отырысы барысында сотталушының қылмыс жасағаны дәлелденді.

Степногорск қалалық сотының үкімімен әйел ҚР Қылмыстық кодексінің 190-бабы 3-бөлігі бойынша кінәлі деп танылып, 4 жыл 6 айға бас бостандығынан айырылды.

Үкім заңды күшіне енді.

Степногорск қаласының прокуратурасы азаматтарды тұрғын үй сатып алуға қатысты мәмілелер жасағанда қырағы болуға, ұсынылатын қызметтердің шынайылығын, қызмет көрсететін адамдардың өкілеттігін және ақша алуға заңды негіздерінің бар-жоғын тексеруге шақырады.

Тиісті құжаттар мен заңды кепілдіктерсіз тұрғын үй мәселесін тиімді шарттармен шешіп беруге уәде ететіндерге сенбеңіз. Мұндай ұсыныстар алаяқтықтың белгісі болуы мүмкін.

Оқи отырыңыз:

• Садыр Жапаров екінші президенттік мерзімге сайлауға түсу жоспарын жариялады
• Колумбиядағы жер сілкінісінен қаза тапқандар саны 280-нен асты