17 миллион теңге пара алып сотталған Ақтау қалалық сотының бұрынғы төрағасы бостандыққа шығуға тырысуда

Ақтау қалалық сотының бұрынғы төрағасы Бауыржан Шайдуллин өзін түрмеге қамауға себеп болған үкімге шағымданды. Бірінші инстанция соты оны алаяқтық пен пара беруге итермелеу бойынша кінәлі деп танып, 9 жылға бас бостандығынан айырған болатын, деп хабарлайды Orda.kz.

Экс-судья бұл жазаға келіспей, апелляциялық шағым түсірді. Маңғыстау облыстық соты Orda.kz-ке апелляциялық шағым қаралатын күн әлі белгіленбегенін хабарлады.

Еске салайық, Шайдуллин ірі көлемде пара алу дерегі бойынша сотталған. Сот үкімінен белгілі болғандай, бұрынғы ақтаулық судья салық төлеуден жалтарды деп айыпталған әйелден, яғни кәсіпкер Зухра Әбішевадан бостандығынан айырмау жазасын қамтамасыз ету үшін 17 миллион теңге талап еткен.

Кәсіпкерге түрмеге түсу қаупі төнген кезде жазадан жалтарудың жолын іздей бастайды. Осы кезде көмекке оның азаматтық күйеуі — сот орындаушысы Ринат Жанахметов келеді. Ол өзін Ақтау қалалық сотының төрағасы Бауыржан Шайдуллинмен доспын деп таныстырып, «істі жабуға» көмектесуге уәде береді.

Ашкөздік пен алдау әдісі

Тергеу нұсқасына сәйкес, судья қиын жағдайға түскен кәсіпкерге көмектесуге келіседі. Бірақ оның «көмегі» арзан болмайды.

«Айыпталушы Б.Ж.Шайдуллин кәсіпкер З.У.Әбішеваны пара беруге итермелеп, аса ірі көлемде оның ақшалай қаражатын иемдену ниетімен, Р.М.Жанахметовтің сеніміне кіріп, қызметтік жағдайын пайдалана отырып, айыпталушыға бас бостандығынан айырмайтын жаза тағайындау мәселесін шешу үшін прокуратура мен сот органдарының лауазымды тұлғаларына берілуі тиіс деген желеумен 20 миллион теңге талап еткен» деп жазылған іс материалында. 

Біраз келіссөздерден кейін, Шайдуллин «жомарттық» танытып, соманы 17 миллион теңгеге дейін төмендетеді. Ал азаматтық күйеуі Әбішевадан 18 миллион теңге талап етіп, артық бір миллионды өзіне «делдалдық ақы» ретінде алып қалмақ болған.

Кәсіпкер әйел үшін бұл қаражат тым қомақты болып шықты. Ол Антикорға жүгініп, судьяны әшкереледі. Осыдан кейін арнайы қызмет өкілдері Шайдуллинді бақылауға алады. Пара берілетін күні Әбішеваға белгі салынған 17 миллион теңге беріледі. Ол ақшаны Жанахметовке тапсырады, ал ол ақша толы сөмкені қалалық сот төрағасының жүргізушісіне береді.

«2024 жылғы 7 маусымда сағат 12:45-те Ақтау қалалық сотының автотұрағында, сот төрағасының жүргізушісі О.Е.М басқарған қызметтік көлікке отырып, айыпталушы Б.Ж.Шайдуллин  өзінің қылмыстық ниетін жүзеге асырып, үйіне келген. Үйдің алдында ол көліктен түсіп, ақша толы сөмкені алған» деп жазылған үкімде. 

Дәл осы сәтте жемқорлыққа қарсы қызмет судьяны ұстап алады. Алайда Шайдуллин сөмкеде ақша бар екенін білмедім деп ақталады, «онда балалар киімі бар деп ойладым» деген нұсқасын алға тартады.

«Сот Б.Ж.Шайдуллинның сөмкеде ақша бар екенін білмедім деген сөзі шындыққа жанаспайды деп есептейді. Бұл нұсқаны сот процесінде зерттелген айғақтар, оның ішінде Е.М.Оразалиннің куәгерлік көрсетулері және өзге де материалдар жоққа шығарады» деп жазылған сот құжатында. 

Барлығы жауапқа тартылды

Жиналған айғақтар Бауыржан Шайдуллин мен Ринат Жанахметовті сотқа тартуға жеткілікті болды. Екеуі де бас бостандығынан айырылды.

Ал кәсіпкер Зухра Әбішевада да жазадан құтыла алмады, салық төлеуден жалтару ісі бойынша ол да кінәлі деп танылып, үш жылға бас бостандығынан айырылды.

Биылғы жылдың басында  елдің заңнамасына сыбайлас жемқорлыққа қарсы бірнеше жаңалық енгізу, оның ішінде   пара туралы сөз қозғағандар да жазалансын деген ұсыныс жасалды. 

Биылғы қаңтар айында Көкшетаудағы ТЖМ академиясында оқытушылар курсанттардан ақша бопсалап, ТЖМ курсанттары бес мың теңге пара бергені үшін сотталды.

Мамыр айында Ақтөбеде әскери тергеу басқармасының басшысы мен тергеуші пара алғаны үшін сотталды.

Жақында Жамбыл облысында Сарысу аудандық полиция бөлімі бастығының орынбасары пара алып, ұсталды.

Ақпан айында Трамп АҚШ компанияларына  қазақ шенеуніктеріне пара беруге рұқсат берді.