Ақтөбеде әскери тергеу басқармасының басшысы мен тергеуші пара алғаны үшін сотталды

Батыс өңірлік әскери-тергеу басқармасының басшысы Мұхит Жауғашев 9 жылға бас бостандығынан айырылды, деп хабарлайды Orda.kz.

Ол қорқытып, 700 мың теңге пара алған. Ұстау кезінде қасында болған тергеуші Асхат Сәдуақасов 8 жылға сотталды.

Бүгін Ақтөбе гарнизонының әскери соты екеуіне үкім шығарды. Олар Қылмыстық кодекстің 366-бабы 3-бөлігінің 1 және 2-тармақтары бойынша айыпталды. Тергеу “адамдар тобының алдын ала сөз байласуы арқылы пара алу” фактісі бойынша жүргізілген. Сот материалдарына сәйкес, олар 1 миллион теңге талап еткен, 700 мың теңгесін алған кезде ұсталған.

Сот полковник Мұхит Жауғашевті 9 жылға, ал аға лейтенант Асхат Сәдуақасовты 8 жылға бас бостандығынан айырды. Екеуінің де әскери шендері алынып, өмір бойына мемлекеттік қызметте, судья, жергілікті өзін-өзі басқару, Ұлттық банк, қаржы және квазимемлекеттік сектор салаларында лауазымды қызмет атқару құқығынан айырылды.

Мұхит Жауғашев Қордай ауданындағы Отар станциясында дүниеге келген. ҚР азаматы, ұлты — қазақ, үйленген, жоғары білімі бар, бұрын сотталмаған. Ол Батыс өңірлік басқармасын басқармас бұрын ҚР ІІМ-нің Оңтүстік өңірлік әскери-тергеу басқармасының басшысы болған. Сол кезде мекеменің есепшісі сотталған, бірақ Жауғашевтің кінәсі дәлелденбеген еді.

Асхат Сәдуақасов — 26 жаста, Талдықорған қаласында туған, үйленген, жоғары білімі бар, бұрын сотталмаған. Сот жәбірленуші Тұрмағанбетовке алынған 700 мың теңгенің қайтарылатынын хабарлады.

Автор: Ардақ Ерубаева