Зират маңында салынған балалар ойнайтын алаң туралы әкімдік жауап берді

Әлеуметтік желілерде Маңғыстау облысы Аташ ауылында түсірілген зират маңындағы балалар ойын алаңының бейнежазбасы қызу талқыға түсті, деп хабарлайды Orda.kz.

Зират маңындағы балалар ойнайтын алаңның бейнежазбасын блогер Нұркен Тәжібай әлеуметтік желісінде жариялады. 

«Бос жер жоқ қой Қазақстанда. Бос болған соң әкімдер сала салған ғой» деп жазды бір желі қолданушысы. 

«Өлі кісіден қорықпа, тірі адамнан қорық деген. Бірақ сонда да біртүрлі суық көрінеді екен» деп жазды тағы бір желі қолданушысы

Бұл жағдайға қатысты «түк те етпейді» деп оң қарағандар да, «сұмдыққа» балап, дабыл қаққандар да бар. 

Осыған байланысты Түпқараған ауданы әкімдігі түсініктеме берді. Ресми мәліметке сәйкес, ойын алаңы 2016 жылы ауыл тұрғындарының ұсынысымен салынған.

«Бұл – өз бетімізбен қабылдаған шешім емес. Алаң орнын ауыл тұрғындары ұсынған», — деді әкімдік өкілі.

Сонымен қатар ведомство бұл ойын алаңының ешкімге кедергі келтірмейтінін алға тартты.