Жүрегі 1 емес 5 рет тоқтап қаза тапқан Айболат Мұратханның ісі алға жылжыды

Талғар маңындағы Еңбекшіқазақ ауданында кісі қолынан қаза тапқан 14 жасар Айболат Мұратханның екі жылға жуық тергеуі бітпеген іс Orda.kz мақаласынан кейін алға жылжып, тергеу аяқталды.

Осыдан 1,5 ай бұрын Orda.kz тілшісі Айболат Мұратханның ісіне қатысты екі мақала жариялады. Сонымен қатар, бұл оқиға Orda.kz YouTube арнасы көрермендерін де бей-жай қалдырмады. Бұл іске қатысты редакциямызға Айболаттың отбасынан тергеу алға жылжыды деген ақпарат келді.  Материал жарыққа шыққан соң, 1 жыл 8 ай бойы бостандықта жүрген күдікті уақытша ұстау изоляторына қамауға алынған.  

Еске сала кетейік, алдымен жасөспірмнен ақша бопсалап, артынша алған ауыр соққылардан араға бірнеше күн өткен соң жан сақтау бөлімінде жүрегі бір емес бес рет тоқтап, қаза тапқан Айболат Мұратханның ата-анасы 1 жыл 8 айға бойы әділдікке жете алмаған еді.

Отбасының адвокаты Нұрлан Жақсыбековтың айтуынша, қылмыстық істің ұзақ уақытқа созылып, тиісті дәрежеде тергелмеуіне істі бірінші болып алған тергеушінің өз жұмысына немқұрайлы қарағаны себеп болды. 

«Бұл қылмыстық істі осымен екінші тергеуші қарап жатыр. Тергеудің ұзаққа созылып кетуіне байланысты айтатын болсақ, алғашқы тергеуші қылмыстық іс қозғалған күннен бастап 5 ай бойы тергеу жүргізбек түгілі, ешқандай шара қабылдамаған. Айболат наурыз айында қайтыс болса, оның анасын тек мамырда ғана жауап алуға шақырды. Артынша, ол жұмыстан шығып кеткен соң іс басқа тергеушінің қолына өтті. Қазіргі таңда біз іспен қайта таныстық, енді тергеу аяқталды. Қылмыстық істі прокуратураға жіберуі керек. Олар 10 күн ішінде шешім шығару керек. Егер прокуратура істі сотқа жіберуге толық негіз бар десе, іс сотқа өтеді. Дегенмен, прокуратура істі қайта тергеуге жіберуі де мүмкін», — деді қорғаушы Жақсылықов.

Айта кетейік, қылмыстық іс 106-баптың 3-тармағы, яғни «адам денсаулығына қасақана ауыр зиян келтіру, салдарының өлімге әкеп соғуы» бабы бойынша қозғалды.

Orda.kz алдағы уақытта істің қалай өрбитінін өз бақылауында ұстайтын болады.