Журналистке тілін көрсеткен шымкенттік судья жауапкершілікке тартылды

Шымкент қаласының қылмыстық істер жөніндегі мамандандырылған ауданаралық сотының судьясы Әбінұр Қарабаев журналистерге қатысты түсініксіз ишарат жасағаны үшін жазаланды, деп хабарлайды Orda.kz.

Қала әкімінің бұрынғы орынбасары Руслан Берденовке қастандық жасау туралы іс қаралған отырыс барысында судья тілші Ботагөз Омароваға тілін көрсетті. Журналист мұны камераға түсіріп алды. Видео әлеуметтік желілерде тез тарады. Шымкенттің мамандандырылған ауданаралық қылмыстық сотында бейнежазба жарияланғаннан кейін қызметтік тексеру жүргізілді, материалдар судьялар әдебі жөніндегі комиссияға, содан кейін Сот алқасына берілді.

«Сот алқасының шешімімен А.Б.Қарабаев ескерту түріндегі жаза қолданыла отырып, тәртіптік жауапкершілікке тартылды», деп хабарлады Жоғары сот кеңесі.

Ведомствоның түсініктемесінде Сот алқасы сот қоғамдастығының тәуелсіз тәртіптік органы ретінде қызмет ететінін және жазалау шараларымен айналыспайтынын мәлімдеген.

«Сот алқасының міндеті – судьяларға қатысты жаза тағайындау емес, тиімді тәртіптік шаралар арқылы судьялардың жауапкершілігін арттыруға және сот процесіне қатысушылардың сенімін нығайтуға ықпал ету», деп атап өтті Жоғары сот кеңесі.

Қарабаевтың өзі жағдайға әзірге түсініктеме берген жоқ. Бұған дейін ол бұрынғы мәдениет министрі Арыстанбек Мұхамедиұлының ісі мен Астанадағы Kaspi бөлімшесін басып алуды тергеу сияқты ірі процестерге қатысқан болатын.

Біз осыған дейін журналист Ботагөз Омарова Шымкентте Берденовтің ісіне қатысты өтіп жатқан сот отырысынан күтпеген сәтті әлеуметтік желіде жариялағаны туралы жазған болатынбыз.