Берденовтің сотындағы тосын жайт: Судья журналистке тілін шығарды

Журналист Ботагөз Омарова Шымкентте Берденовтің ісіне қатысты өтіп жатқан сот отырысынан күтпеген сәтті әлеуметтік желіде жариялады. Ол жариялаған бейнежазбада сотқа төрағалық еткен судья Әбінұр Қарабаев тілшіге тілін шығарғаны көрінеді, деп хабарлайды Orda.kz.

Ботагөз Омарова  тілін шығарған судьяны бірінші рет көріп тұрғанын айтты.

«Менің журналистік тәжірибемде небір жағдай болды. Бірақ судьяның тіл көрсеткенін алғаш рет көруім. Бүгін Шымкент әкімінің бұрынғы орынбасары Руслан Берденовке қатысты процеске қатысып отырғанда, төрағалық етіп отырған  судья Қарабаев маған кенеттен тілін көрсетті. Әрине, таңқалдым. Сол сәтті бейнежазбаға түсіріп, сіздерге жария етуді жөн көрдім»  деп жазды Омарова. 

Ол судьяның әрекетін өзінше болжап, әзіл-шыны аралас бірнеше нұсқа ұсынды:

• «Судья Қарабаев Шымкентте алғаш рет астаналық журналисті көріп отыр»;
• «Ол іштей тик-токқа әуес болып, тренд жасамақ болды»;
• «Мен сондай тартымды әйелмін. Бәрін толқытып жіберемін. Судьяның өзі менің алдымда өзін ұстай алмайды». 

Омарова тибеттік дәстүрді де еске салды: 

«Тибетте тіл шығару – сәлемдесу. Себебі аңыз бойынша, жындардың тілі жасыл болады екен. Сондықтан тілін көрсеткен адам өзінің таза екенін дәлелдейді». 

Алайда ол жазбасын әзілмен аяқтады:

«Мен Тибетте емеспін, Шымкенттемін. Сондықтан Қарабаев мырзаның бұл қылығына таңқалдым. Бірақ ол жын-шайтанмен жолықпайды деп сенемін. Барлығы жақсы. Уайымдаудың қажеті жоқ. Әріптестер, мүмкін ол басқаға да тілін көрсеткен шығар?». 

Еске сала кетсек, Шымкентте әкімнің орынбасары Руслан Берденовке қастандық жасау ісі бойынша тергеу жалғасып жатыр. Сот отырысына жәбірленуші Руслан Берденов онлайн түрде қатысқан еді. Ол айыпталушы Жиенбайдың сөздерін жоққа шығарып жатыр.