«Журналистерге тұсау»: Министрлікпен соттасқан журналистер жеңіліп қалды

Астана қаласының ауданаралық соты Мәдениет және ақпарат министрлігіне қарсы 12 журналистің ұжымдық талабын қанағаттандырмады, деп хабарлайды Orda.kz.

Олар жаңа «Аккредитацияның типтік ережелеріне» енгізілген өзгерістерді заңсыз деп, сот арқылы шағымданған болатын. Журналистер ережелердің мемлекеттік тіркеуден өтпегенін және ресми жарияланбағанын алға тартып, бұл жаңашылдықтар сөз бостандығын шектейді деп есептейді.

Талапкерлердің айтуынша, аккредитация енді ақпаратты тек сол аккредитацияны берген БАҚ арқылы таратуға мүмкіндік береді. Бұл талапты екі рет бұзған жағдайда журналистер аккредитациядан айырылуы мүмкін. Алайда сот аккредитация ережелері ақпарат алмасуды реттеу үшін жасалғанын және сөз бостандығын шектемейтінін атап өтті.

Бұл ережелер жайлы  Аида Балаева «шағымдануға құқықтарыңыз бар» деп пікірін айтқан болатын. 

Соңғы уақытта мемлекеттік органдар журналистерді шеттетуге тырысып жатыр. Мысалы, аккредитациядан айыру және ғимаратқа кіруге тыйым салу Мәдениет және ақпарат министрлігінің жаңа ережелерінде қарастырылған.

2024 жылдың жазында «Ашық НҚА» сайтында БАҚ аккредитациясының жаңа ережелері туралы бұйрық жобасы жарияланды. Бұл ережелерге журналисті өз кәсіби міндеттерін орындау құқығынан айыратын көптеген тармақтар енгізілген. Мәселен, аккредитацияланған журналистер енді аккредитация берген ұйымның іс-шарасының регламентін сақтауға міндетті.

Ал регламент қандай? Ешқандай, әр ұйымдастырушы өзіне қолайлы регламент ойлап таба алады. Мысалы, іс-шара тақырыбына қатысты емес сұрақ қоюға тыйым салынуы мүмкін.