Жұмыс күші жетіспейтін өңірлерге қоныс аударғандарға 7 миллион теңгеге дейін төленеді

Қазақстанда жұмыс күші жетіспейтін өңірлерге ерікті түрде қоныс аударғандарға арналған бағдарлама жаңартылып жатыр, деп хабарлайды Orda.kz.         

Енді қатысушылар жеке баспана сатып алу үшін 7 миллион теңгеге дейін қаржы ала алады, бұл туралы Еңбек және халықты әлеуметтік қорғау министрлігі хабардар етті.

Бағдарламадағы басты өзгеріс — экономикалық ұтқырлық сертификаты мөлшерінің ұлғаюы. Енді оның ең жоғары көлемі 1 625 АЕК, яғни шамамен 7 миллион теңге болады.

Бұл қаражатты қатысушы көшіп баратын өңірден тұрғын үй сатып алуға жұмсауға болады.

Сертификаттан бөлек, қоныс аударушыларға басқа да қолдау шаралары ұсынылады. Мемлекет көшу шығындарын субсидиялайды, тұрғын үйді жалдау мен коммуналдық қызметтерге кеткен шығындарды өтейді, сондай-ақ жұмысқа орналасуға көмектеседі.

Сонымен қатар, жұмыс орнын көшпей тұрып-ақ таңдауға мүмкіндік бар. Ол үшін қабылдаушы өңірлердің өкілдері бос жұмыс орындары жәрмеңкелерін өткізеді, сондай-ақ жұмыс берушіні қашықтан таңдау мүмкіндігі қарастырылған.

Бағдарлама енді қазақстандықтардың кең ауқымы үшін қолжетімді болды. Бұрын ол негізінен жұмыссыздарға арналса, енді мемлекеттік қолдауды сұранысқа ие мамандар мен шаруа және фермер қожалықтарының басшылары да пайдалана алады.

Өтініш беру, көшу картасымен танысу, өңірлерде қандай мамандар қажет екенін білу және лайықты жұмыс табу үшін  migration.enbek.kz порталы арқылы онлайн өтініш беруге болады.

Ерікті қоныс аудару бағдарламасы 2017 жылдан бері жұмыс істейді. Осы уақыт ішінде оған 73,9 мың адам қатысқан, олардың 31 мыңы мемлекеттік қолдаудың арқасында тұрақты жұмысқа орналасқан.

Оқи отырыңыз:

• Елімізде небәрі 240 адам тұратын ең аз ұлт қайсы?
• «Семей орманы» резерватындағы ірі өрт екі аптадан кейін толық сөндірілді