Жұқпалы аурулар маманы: Екпе ауру қоздырады деген — қауесет

Вакцина туралы ең кең тараған қате түсініктердің бірі —  екпенің аутизм тудырып, ауру қоздырады деген сөз. Астанадан келген медицина ғылымдарының докторы, жоғары санатты жұқпалы аурулар маманы (инфекционист дәрігер) Динагүл Баешева жоққа шығарды, деп хабарлайды  Orda.kz денсаулық сақтау министрлігіне сілтеме жасап.

Дәрігердің айтуынша, көптеген ата-аналар балалардағы аутизмді екпемен байланыстырады, өйткені оның белгілері вакцинадан кейін пайда болуы мүмкін деп ойлайды.

«Ғылым нақты жауап береді: вакциналар аутизм тудырмайды. Бұл миллиондаған бала қатысқан ауқымды зерттеулермен дәлелденген.
Осындай  шатасу қайдан шықты? Аутизмнің алғашқы белгілері көбіне 1,5–2 жас аралығында байқалады,  дәл осы кезең ревакцинация уақытымен сәйкес келеді. Бірақ бұл тек уақыт жағынан сәйкестік қана. Маңыздысы сәйкестік себеп-салдарлық байланысты білдірмейді», — деп түсіндірді Астана медицина университетінің балалар жұқпалы аурулары кафедрасының меңгерушісі Динагүл Баешева. 

Медицина ғылымдарының докторы аутизм баланың дүниеге келуіне дейін қалыптасатынын және ол мидың даму ерекшеліктері мен генетикалық факторларға байланысты екенін еске салды. Вакцина бұл үдерістерге әсер етпейді — керісінше, олар баланы қауіпті инфекциялардан қорғайды.

«Дәрігерлер күн сайын қызылша, көкжөтел және алдын алуға болатын басқа да аурулардың ауыр салдарымен бетпе-бет келеді. Кейде көмек кеш болып жатады. Вакцинация — қауіп емес, қорғаныс», — деп атап өтті инфекционист. 

Вакцинация мен аутизм арасындағы байланыс туралы қате пікір 1998 жылы The Lancet журналында жарияланған мақаладан кейін пайда болған. Кейін бұл деректердің қолдан жасалғаны анықталып, мақала кері қайтарылды, ал оның авторы медициналық лицензиясынан айырылды.

Дүниежүзілік денсаулық сақтау ұйымы да бұған дейін вакциналар аутизм тудырмайтынын және адамның өмірін сақтайтынын бірнеше рет мәлімдеген, ал мұндай пікірлердің ғылыми негізі жоқ екенін атап өткен.

Өткен жылдың қыркүйегінде Алматы қаласынан бір блогер аутизмі бар балаларды өлтіруге шақырып, олардың сезімі жоқ деп мәлімдеген. Полиция бұл факті бойынша қылмыстық іс қозғап, тиісті шаралар қабылданатынын хабарлаған.

Оқи отырыңыз:

• Министрлік қызылша ауруы өршуіне байланысты қазақстандықтарға үндеу жасады
• «Балаларға ауру туғызатын арзан екпе сатып алынады»: ДСМ мәлімдеме жасады
• COVID-19-ға қарсы екпе бедеулік туғызбайды!