COVID-19-ға қарсы екпе бедеулік туғызбайды!

Иммун тапшылығы вирусын жұқтырғандарға коронавирусқа қарсы егілуге болады. Бұл туралы денсаулық сақтау мекемелері мен медицина ғылымдарының докторларымен өткен брифингте айтылды. «Спутник V» вакцинасын салдырған 2 млн ресейліктер арасында иммун тапшылығы вирусын жұқтырғандар да болған. Осыған сүйене отырып, қазақстандық дәрігерлер бұл санаттағы азаматтарға COVID-19-ға қарсы вакцина салуға болады деп шешті. Ал енді,  екпенің бедеулікке әкелетіні туралы қауесетті дәрігерлер жоққа шығарды.

«Вакцинаны жаппай ектірместен бұрын оны зертханада түрлі сынақтан өткізеді. Жануарларға тестілегені жөнінде де талай айтылған. Бедеулікке әкеп соқтыру қаупі қашан да тексеріледі. Бұл міндетті сынақтың бірі. Ол жіті зерттеледі. «Спутик V», «QazCovidIn» және өзге де вакциналар адамның репродуктивті денсаулығына ешқандай әсерін тигізбейді», -  деді Ұлттық фтизиопульмонология ғылыми орталығы директорының орынбасары Ләззат Ералиева.

Брифингте айтылған тағы бір басты мәселе: коронавирусқа қарсы екпе паспортын ешкім саудалай алмайды. Өйткені COVID-19-ға қарсы вакцина егілгені туралы ақпар жабық мәліметтер қорына енгізіледі, әрі электронды паспорт тек сол жүйеде ғана сақталады. Ел арасында коронавируспен ауырғандарға вакцина салдыру міндет емес деген пікір қалыптасқан. Мамандар бұл пікірді де жоққа шығарды.

Ләззат Ералиеваның айтуынша,  коронавируспен ауырып шыққан соң адамда вирусқа қарсы иммунитет халықаралық зерттеу қорытындысына сәйкес,  5-6 ай ғана сақталады екен.

Сондықтан бәрібір вакцина алған дұрыс дейді мамандар. Себебі ауырып шыққаннан кейінгі иммундық қарсылық тұрақты емес. Вакциналардың дозасына қатысты мәселе қайта қаралуы мүмкін, сол себепті  адамдарға қайта егілуге тура келуі де мүмкін екен. Қазір клиникалық сынақтар  жалғасуда.