Жогорку Кенештің депутаты бұрынғы әйелін соққыға жықты деген күдікке ілінді

Қырғызстанда Жогорку Кенештің депутаты Эльдар Сулайманов отбасылық зорлық-зомбылық жасады деген күдікке ілінді, деп хабарлайды Orda.kz.

Әлеуметтік желі қолданушысы Әсел Азаматова елден көмек сұрап, жазба жариялады. Ол — қазіргі Жогорку Кенеш депутаты Эльдар Сулаймановтың бұрынғы жұбайы екен.

Әсел Азаматова бұынғы күйеуі тарапынан бірнеше рет зорлық-зомбылық көргенін жазды. Оның сөзінше, ұрып-соғу Эльдар Сулайманов 2022 жылдың басында Жогорку Кенеш депутаты болған кезден басталған. Жазбада 2022 жылдың жазында соққыға жығылғаннан кейін ауруханаға түскені және полицияға арызданғаны жазылған. Алайда, Әсел Азаматова «бірде-бір құқық қорғау органының қызметкері» телефон арқылы да хабарласып не болғанын сұрамағанын мәлімдеді. 

Депутаттың бұынғы әйелінің жазбасы мен арызынан кейін Бішкек қаласында сотқа дейінгі тексеру басталды. Қалалық ішкі істер басқармасының хабарлауынша, қабылданған шаралар аясында өтініш иесіне қатысты қорғау нұсқамасы шығарылған.

Қазіргі уақытта полиция қызметкерлері қажетті тексеру іс-шараларын жүргізіп жатқанын хабарлады.

Айта кетейік, Ақмола облысында Астрахан аудандық мәслихаты төрағасының үйін тонаған үш ұрыға қатысты үкім шықты.