Ақмола облысында мәслихат төрағасының үйін тонағандар сотталды

Ақмола облысында Астрахан аудандық мәслихаты төрағасының үйін тонаған үш ұрыға қатысты үкім шықты, деп хабарлайды Orda.kz Halyqstan-ға сілтеме жасап. 

Сотталушы орнында Тараз бен Шымкент қалаларының тұрғындары отырды. Олар ірі мөлшердегі тонау, тұрғын үйге заңсыз кіру, сондай-ақ алдын ала сөз байласқан адамдар тобы жасаған ұрлау мақсатынсыз автокөлікті айдап кету қылмыстары бойынша кінәлі деп танылды.

Сот анықтағандай, 2025 жылдың шілде айында үш ер адам әдейі Астраханка ауылына келген. Түнгі уақытта хлор құрамды зат салынған баллонмен қаруланған олар үйге басып кірген. Үй ішінде төрт ересек адам мен үш жастағы бала болған.

Қаскөйлер ақша мен бағалы заттарды талап еткен. Қолма-қол ақша мен зергерлік бұйымдарды иемденген соң, олар отбасын жертөлеге қамап, үй иесінің автокөлігімен оқиға орнынан қашып кеткен. Келтірілген жалпы материалдық шығын 4,2 млн теңге болды.

Сот екі айыпталушыға бұрын өтелмеген жазаларын ескере отырып, қатаң қауіпсіздік мекемесінде 8 жыл 6 ай бас бостандығынан айыру жазасын тағайындады. Үшінші қатысушы орташа қауіпсіздік мекемесінде 5 жылға сотталды.

Айта кетейік, Батыс Қазақстанда өртенген үйден үш адамның денесі табылды.