Жоғарғы сот Дана Әтешованың «жыр» болған үйіне қатысты өтінішті қараудан бас тартты

Жоғарғы сот  Дана Әтешоваға қатысты істің барлық материалдарын зерттей келе, мүлік Марат Әйтенов пен бұрынғы жұбайының некесіне дейін алынғанын анықтап, Әтешованың өтінішін қараудан бас тартты.

Өтініште Әтешова үй неке кезінде ерлі-зайыптының ортақ қаражатына сатып алынғанын айтқан болатын. Бұған дейін Астана қаласының азаматтық істер жөніндегі ауданаралық соты мен азаматтық істер жөніндегі сот алқасы бұл мәлімдемелердің сәйкес еместігін айтты.

Енді Жоғарғы сот «жыр» болған үйге қатысты нақты нүкте қойды. Судья Разия Қуанышбаева бұл шешімдерді қайта қарауға негіз таппай, адвокат Әтешованың өтінішін кассациялық алқаға беруден бас тартты. Яғни, үй бұрынғы қожайындарында қалады, оған Дана Әтешова талап қоя алмайды.

Еске сала кетейік, Дана Әтешова әлеуметтік желіде тікелей эфирге шығып, оны және үш баласын Марат Әйтенов үйінен күштеп шығарғанын көрсеткен болатын.