Жетісу облысында алаяқ әйел жоқ бизнестен 100 миллион теңгеден астам пайда тапқан

Жетісу облысының тұрғыны шын мәнінде жоқ бизнесті табысты жоба ретінде көрсетіп, адамдарды оған ондаған миллион теңге инвестиция салуға көндірген, деп хабарлайды Orda.kz.      

Тергеу мәліметінше, әйел өзін компания басшысы ретінде таныстырып, ұсақ мал жеткізуге байланысты бизнеске қаржы құюды ұсынған.

Сенім тудыру үшін келісімшарттар рәсімделіп, заңды кәсіпкерлік қызметтің бар екендігін көрсететін құжаттар ұсынылған.

Екі жәбірленуші кәсіпкер әйелдің уәдесіне сеніп, несие рәсімдеп, ақшаны компания шоттарына аударған. Алайда іс барысында ешқандай бизнес болмағаны анықталды, мал сатып алынбаған және ешқайда жеткізілмеген.

Түскен қаражатты әйел өз қалауынша пайдаланған. Тергеу деректеріне сәйкес, қаржының бір бөлігі шетелге аударылып, қолма-қол ақшаға айналған. Жалпы келтірілген шығын 100 миллион теңгеден асқан.

Тергеу барысында сараптамалар барлық құжаттардың жалған екенін, ал көрсетілген мүліктің мүлде болмағанын растады.

«Мұндай схемалар азаматтардың сеніміне негізделеді. Қаскөйлер заңды бизнес көрінісін жасап, жалған құжаттарды пайдаланып, адамдарды ірі ақша салуға итермелейді. Сондықтан ақпаратты мұқият тексеріп, асығыс қаржылық шешім қабылдамау маңызды», деп атап өтті полиция. 

Сот әйелге 5 жыл бас бостандығынан айыру жазасын тағайындады. Сондай-ақ оған осы мерзім ішінде жеке ұйымдарда басшылық қызмет атқаруға тыйым салынды.

Оқи отырыңыз:

• Сағатына 100 мың жалған хабарлама: Құпия деректер мен банктегі қаражатты қолды қылатын алаяқтардың жолы кесілді
• Түркістан облысында 20 жастағы алаяқ ойын арқылы кәмелетке толмағандардан ақша бопсалаған
• Қарағандыда алаяқ бәске тіккен 86 млн теңгесінен қағылды