Жетімдерді баспанасыз қалдырған депутат 67 млн пайда көрді

Ақтөбе қалалық №2 сотында әлеуметтік осал азаматтарды баспанасыз қалдырған депутаттардың ісі қаралып жатыр. Мұғалжар ауданында қазір 1600-ге жуық адам үй кезегінде тұр, деп хабарлайды Orda.kz.

Іс материалдарына сүйенсек, 2020 жылы Мұғалжар аудандық мәслихатының бұрынғы төрағасы Бақытжан Қадралин «Базис» ЖШС-нен ескі жатақхананы 8 млн теңгеге сатып алған. 2023 жылы оны 70 пәтерлі үй ретінде мемлекетке 672 млн теңгеге өткізген. Сотта әр пәтердің құны 3,4 млн теңгеден 12,6 млн теңгеге дейін бағаланғаны айтылды.

Сатып алынған нысандар:

• «СНПС-Ақтөбемұнайгаз» АҚ-ның 279 шаршы метрлік ғимараты — 11,7 млн теңгеге;
• Қандыағаштағы пәтер — 9,8 млн теңгеге;
• Сол компанияның тағы бір 2 503 шаршы метрлік нысаны — 123,5 млн теңгеге алынған.

Қазір бұл мүліктер мен қаржы айналымы тергеу аясында тексеріліп жатыр.

Осыған дейін Ақтөбе қалалық сотында  сотталып жатқан депутаттар ісі туралы жаздық. Жетім балалар мен көпбалала отбасыларды баспанамен қамтуға үшін мемлекеттен бөлінген жүздеген миллион теңге жекеге аударылып кеткен. Соңында тексерушілер үйді де, ақшаны да таппай қалды. 

Мұғалжар аудандық сотының қаулысымен 2023 жылы келісімшартты заңсыз деп танылып, екінші депутаттың әйелі А.Ә.-ден 672 млн теңгені қайтару туралы шешім қабылданды. Себебі бес қабатты ғимарат жатақхана деп тіркеулі тұр. Үй ішіндегі қабырғаларды бұзу, қайта жаңғырту кезінде техникалық талаптар сақталмаған. Депутаттарға қатысты іс сотта әр аптаның сейсенбі, сәрсенбі күндері таңертеңнен кешке дейін қаралатын болады.

Автор: Ардақ Ерубаева