Женевада G7 саммитіне қарсы мыңдаған адам наразылыққа шықты

Женевада 15 маусымда Францияның Эвиан қаласында басталатын G7 саммитіне қарсы жаппай наразылық акциялары өтті, деп хабарлайды Orda.kz DW-ге сілтеме жасап.

Полицияның мәліметінше, шеру басталған кезде көшеге шамамен жеті мың адам шыққан. Кейін демонстранттар саны 15 мыңға дейін артқан.

Қатысушылар «Үлкен жетілік» саммитіне және оған қатысушы елдердің саясатына қарсы екенін білдіріп, сонымен қатар Палестинаны қолдау, климат мәселелері мен әлеуметтік реформалар туралы ұрандар көтерді. Олардың айтуынша, ірі мемлекеттер басшылары қабылдайтын шешімдер бүкіл әлемдегі миллиондаған адамға әсер етеді, бірақ бұл шешімдерге олардың өзі қатыспайды.

Акция барысында наразылық білдірушілер Tesla автокөлігін өртеп, банктердің бірінің терезелерін сындырған. Билік ықтимал тәртіпсіздіктерге алдын ала дайындалған, көптеген дүкендер мен қонақүй иелері терезелерін қорғаныш қалқандармен жапқан.

Кейін қалада полициямен қақтығыстар болды. Құқық қорғау органдары қызметкерлеріне бөтелке, тас пен петардалар лақтырған. Бұған жауап ретінде көзден жас ағызатын газ бен су шашқыштар қолданылған.

G7 саммиті Францияда 15–17 маусым аралығында өтеді. Оған Ұлыбритания, Канада, Франция, Германия, Италия, Жапония және АҚШ көшбасшылары қатысады деп күтілген. Сонымен қатар Бразилия мен Үндістанды қоса алғанда, бірқатар елдердің өкілдері шақырылған.

Кездесудің негізгі тақырыптарының бірі — Украинадағы соғыс. Украина президенті 16 маусымда G7 көшбасшыларымен кездеседі. Сондай-ақ ол Ақ үй басшысымен жеке келіссөздер өткізу жоспарын растады.

Оқи отырыңыз:

• Зеленский: Біз Трамппен кездесу туралы келістік
• Швейцария халқы тұрғындар санын 10 миллионмен шектеуге қарсы дауыс берді
• «Босану туризмі»: АҚШ-қа барып босанып, азаматтық алатындардың жолы кесіледі