Рим папасы уағыз дайындауда ЖИ қолданбауға шақырды

Рим папасы Рим епархиясының дін қызметкерлерімен кездесуде жасанды зерде мәселесін көтерді, деп хабарлайды Orda.kz.

Vatican News мәліметінше жабық форматта өткен диалогта рухани жетекшілік, жастармен жұмыс, жасанды интеллект, интернет әсері және дін қызметкерлері арасындағы қарым-қатынас мәселелері талқыланды.

Жастарға үлгі болу және оқшаулану мәселесі

Рим папасы жастармен жұмыс істеуде олардың отбасы жағдайын терең түсінудің маңызын айтты. Көптеген жас ата-анасының ажырасуы, тастап кетуі сияқты ауыр жағдайларды бастан өткерген. Сондықтан дін қызметкерлері оларға жақын болып, қолдау көрсеткені жөн, бірақ «жай ғана құрбы-досқа» айналып кетпеуі тиіс.

Қызметтегі бағыт-бағдар және қауымды тану

Оның айтуынша, пасторлық қызметтің тиімді болуы үшін ең алдымен қызмет ететін қауымды терең тану керек. Қоғам өзгеріп жатыр, сондықтан ескі тәсілдерге байланып қалмай, нақты адамдардың өмір шындығын ескеру маңызды.

Жасанды интеллект пен интернет туралы ескерту

Ол уағызды жасанды интеллект арқылы дайындаудан сақтандырды. Оның сөзінше, уағыз — сеніммен бөлісу, ал сенімді ешқандай технология жеткізе алмайды. Сондай-ақ интернеттегі «лайк қуу» шынайы миссияны алмастырмауы керектігін ескертті. Негізгісі — дұғаға уақыт бөлу және Құдаймен тірі байланыс орнату.

Діни қызметкерлер арасындағы бауырластық

Рим папасы «клерикалдық қызғаныш» мәселесін де көтерді. Бір діни қызметкердің жоғары қызметке тағайындалуы басқалар арасында қызғаныш тудырмауы тиіс. Оның орнына достық пен бауырластық нығаюы керек. Үздіксіз білім алу да маңызды екенін атап өтті.

Қарттық, ауру және өмір құндылығы

Қарттық пен ауруды қабылдау туралы айта келе, ол өмір құндылығы зор екенін баса айтты. Эвтаназия заңдастырылған елдердегі жағдайға тоқталып, дін қызметкерлері ең алдымен өмірдің маңызын өз үлгісімен көрсетуі керегін жеткізді. Ол науқастарға барып, қасиетті рәсімдерді орындауды ұмытпауға шақырды. 

Еске сала кетейік, Қазақстан мұсылмандары діни басқармасы Deep Nostalgia технологиясын марқұмдардың суреттеріне қолдануға жалпы түрде рұқсат берілетінін мәлімдеді.

Оқи отырыңыз:

• Ораза кестесі 2026: Қай уақытта ауыз бекітіп, қай уақытта ауыз ашамыз?
• Рамазан-2026: Пітір садақа мөлшері белгілі болды