Қайрат Сатыбалдының жыр болған «Байсат» базары ақыры сатылды

Алматыдағы бұрын Қайрат Сатыбалдыға тиесілі болған «Байсат» базары электронды сауда арқылы сатылды. Сатып алушы нысан үшін 24,77 млрд теңге төлеген, бұл оның бағалау құнынан шамамен 13%-ға төмен, деп хабарлайды Orda.kz.       

Аукцион 7 тамыз күні Sauda порталында өтті. Саудаға бір ғана қатысушы қатысып, нысанды бастапқы бағамен — 24 772 753 285 теңгеге сатып алды. Сатып алушының аты-жөні әзірге жарияланған жоқ.

Айта кетейік, базарды жарты жылдан астам уақыт бойы сату әрекеттері жасалған. Ол алты рет саудаға шығарылып, бағасы 24,7 млрд теңгеден 28,6 млрд теңгеге дейін өзгеріп отырған. Алайда бұған дейін аукциондарда, тендерлерде және конкурстарда сатып алушы табылмаған.

«Байсат» — Алматыдағы «Барахолка» аумағындағы ірі базарлардың бірі. Ол негізінен тұрмыстық тауарлар, ыдыс-аяқ, шаруашылық заттар мен ойыншықтар сатуға маманданған. Базар Жетісу ауданында, Солтүстік айналма жолы, 7 мекенжайында орналасқан.

Нысан Қайрат Сатыбалдыға, яғни Қазақстанның тұңғыш президентінің жиеніне тиесілі болған. Оның активтерінің бір бөлігі ерікті түрде мемлекетке қайтарылса, қалған үлесі 2024 жылдың қаңтарында сот шешімімен тәркіленген болатын.

Бұған дейін нысанды жекешелендіру нәтиже бермегендіктен, Алматы қаласындағы ірі сауда орындарының бірі — «Байсат» базары жақын арада коммуналдық меншікке өтуі ықтимал деген де ақпарат тараған болатын. Бұл туралы Мемлекеттік мүлік комитетінің төрағасы Нұрмахан Әділбеков айтқан еді.

Оқи отырыңыз:

• «Байсат» базары Алматы әкімдігінің меншігіне берілуі мүмкін
• Қайрат Сатыбалдының ұлына тиесілі «Байсат» базары 2 млрд теңгеге арзандатылып қайта сатылымға шықты
• Қайрат Сатыбалдының Алматыдағы «Байсат» базары осы жолы да аукционда сатылмады