Жапония қазақстандық компанияға санкция салды

Жапония Украинадағы соғысқа байланысты Ресейге қосымша санкциялар енгізіп жатыр. Жапония шектеулері бір қазақстандық компанияға да әсер етті, деп хабарлайды Orda.kz. 

Бұл туралы Жапония министрлер кабинеті отырысында белгілі болды. Экспортқа тыйым салынған тауарлар 355 позицияны құрайды. Атап айтқанда, кран қозғалтқыштарына арналған бөлшектер мен басқа да арнайы жабдықтарға арналған бөлшектер, сондай-ақ шағын мотоциклдер сияқты позициялар. Бұл Ресейдің өнеркәсіптік әлеуетін күшейтуі мүмкін. Сондай-ақ химиялық қаруды әзірлеу үшін қолданылуы мүмкін капсаицин сияқты химиялық заттарды экспорттауға тыйым салынды.

Экспорттауға тыйым 23 қаңтардан бастап күшіне енеді. Үкіметтік шешімде Ресейге санкцияларды айналып өтуге көмектеседі деп күдіктелген алты елдің 31 ұйымына экспортқа тыйым салу қарастырылған. Бұл топтар Қазақстан, Біріккен Араб Әмірліктері (БАӘ), Қытай, Қырғызстан, Таиланд және Түркияда орналасқан.