«Жаңаөзендегі митинг»: Министрлік қақтығысқа араласпайды

12 қарашада Жаңаөзен қаласында «Өзенмұнайгаз» акционерлік қоғамына қызмет көрсететін «Бұрғылау жұмыстары басқармасы» компаниясының қызметкерлері еңбек шарттарын жақсарту және жалақыны көтеру талабымен митингке шықты. Қазір жұмысшылардың кейбірі жұмысқа қайта оралып жатыр, алайда бірқатар қызметкер әлі де наразылық білдіруде, деп хабарлайды Orda.kz.

Еңбек және әлеуметтік қорғау министрі Светлана Жақыпова жағдайға қатысты пікір білдіріп, бұл мәселеге министрлік араласпайтынын айтты. 

«Ұжымдық келісімшарт жұмыс берушінің өз қызметкерлеріне деген міндеттемелерінен маңыздырақ. Қызметкерлердің жалақысын 50%-ға көтеру немесе ұжымдық келісімшартты тағы үш жылға ұзарту туралы талаптарын талқылау үшін олар жұмыс берушімен келіссөз жүргізуі қажет», – дейді Жақыпова.

Еске сала кетсек, Orda.kz Жаңаөзенде жеті күн бойы «бұрғылау жұмыстары басқармасы» компаниясы қызметкерлерінің алаңға шыққаны жайлы жазған болатын.