«Жаңа жыл тойлағандар — күнәһар»: Нұр-Мүбарак оқу орнының түлегі уағыз айтты

Нұр-Мүбарак университетінің түлегі Айнұр Қайратқызы өзінің ainur_ustaz деген instagram парақшасында Жаңа жыл мейрамын мұсылмандарға тойлауға рұқсат жоқ екенін айтып, тойлаған адамның күнәһар болатынын мәлімдеді, деп хабарлайды Orda.kz.

Оның сөзінше «кәпірлер ойлап тапқан» мерекені мұсылмандардың тойлауына рұқсат жоқ.

«Әр жыл сайын атап өтілетін жаңа жыл мейрамын исламда тойлауға тыйым салынады. Біз барлық мұсылманға да мұсылман емеске де жақсылық тілейміз. Егер қазір кәпір адам жаңадан мейрам ойлап тапса, мысалы белгілі күнді белгілеп әр жыл сайын ол күнді атап өтетін болса біз оны қайталай алмаймыз. Жаңа жыл да сол секілді кәпірлердің ойлап тапқан мерекесі болған соң оны біздің тойлауымызға рұқсат жоқ. Өйткені пайғамбарымыз Мұхаммед с.ғ.с. өз хадисінде былай дейді «кім қай қауымға ұқсаса, ол солардан». Ислам ғұламалары бұл хадисті былай түсіндірген «егер мұсылман адам кәпірлердің күпірлігінде оларға ұқпайтын болса діннен шығады, олардың ойлап тапқан әдетінде ұқсайтын болса, күнәһар болады»деді Айнұр Қайратқызы.

Сонымен қатар ол «Жаңа жылыңмен!» деп құттықтау күнә болатынын айтты. Оның сөзінше құттықтауға да «рахмет» деп жауап беруге тыйым салынатын көрінеді.

Еске сала кетсек, Orda.kz заңсыз миссионерлік қызметі үшін, сот алдында жауапқа тартылған атышулы Дарын Мүбаров та қазіргі кезде жұрт алдына шығып, пікірін айтып жүргені жайлы жазған болатын.