Жамбыл облысындағы балаларға қорлық көрсеткен күдікті ұсталды

Ішкі істер министрі Ержан Сәденов Жамбыл облысы Талас ауданында кәмелетке толмаған екі баланы ұдайы таяқтың астында ұстаған адам туралы қылмыстық істі тергеуді жеке бақылауына алды, деп хабарлайды Orda.kz.

ІІМ мәліметінше, күдікті ұсталып, уақытша ұстау изоляторына орналастырылды. Зардап шеккен балалар қажетті медициналық және психологиялық көмек алады. Сонымен қатар жергілікті полиция қызметкерлеріне қатысты қызметтік тексеру жүргізіледі.

Ведомствода атап өткендей, балаларға қатысты зорлық-зомбылықтың кез келген түрі қатаң түрде тоқтатылып, ал кінәлілер заң бойынша жауапқа тартылады.

Бұған дейін Талас ауданында екі жасөспірім табылды. Оларды бір ер адам күш қолданып, мал бағуға мәжбүрлегені белгілі болған. Балалар омбудсмені оларды Тараз қаласына - қиын өмірлік жағдайға тап болған балаларға қолдау көрсету орталығына жеткізілгенін, онда оларға психологиялық және заңгерлік көмек көрсетіліп, қажетті тергеу әрекеттері жүргізіліп жатқанын хабарлады.