«Қамшымен ұрды»: Жамбылда кәмелеттік жасқа толмаған екі баланың құлдықта болғаны анықталды

Жамбыл облысының Талас ауданында кәмелетке толмаған балалардың құлдықта ұсталғаны белгілі болды, деп хабарлайды Orda.kz.

Қазақстанның Бала құқықтары жөніндегі уәкілі Динара Зәкиева бұл оқиғаға қатысты түсініктеме берді. Оның айтуынша, балалардың қай жерде екені анықталған.

«Жамбыл облысының Талас ауданында кәмелетке толмаған балалардың құлдықта ұсталғаны туралы ақпаратқа қатысты айтар болсақ, балалардың тұрған жері анықталды. Бұл дерек бойынша қылмыстық іс қозғалды. Өңірлік уәкіл Даурен Бақжанов барлық мән-жайды анықтау үшін балаларға бара жатыр», – деді ол.

Orda.kz редакция бұл жағдайға қатысты қосымша пікір алу үшін облыстық полиция департаментіне және Оқу-ағарту министрлігіне жүгінді.

Жамбыл облысының полиция басқармасы бұл оқиға бойынша қылмыстық іс қозғалғандығын мәлімдеді.

Кадрлардан балалар көгерген, жараланған жерлерін, сызаттарын көрсетіп жатыр.

«Мен бес жыл тұрдым ба... Бес жыл бойы көрген қорлығым құрысыншы... Бүйтіп туғандарымнан (қорлық ред.) көрген жоқпын. Қамшымен ұрып, сабап, мал бағуға мәжбүрледі. Телефонымды алып қойды. Әр өткен көліктен сағат сұраймыз. Көретін қорлығымыз осы болды. Бүйтіп мен қорлық көрмеп едім. Үстімнің бәрі жара. Әйтеу, жатсам да, тұрсам да бір нәрсені ойлатын болдым. Туған әкемнің қолына барсам ғой деп... Үйдегі анам сөйлегісі келеді. Бірақ анам өзі қорқады. Өтініш, бір көмектесіп жіберіңіздерші. Көмектеспесеңіздер білмеймін, өзіме не істер екенімді...», — дейді 16 жастағы жасөспірім. 

Ал кіші інісі өзін Ұзақбай деп таныстырып, ол да көмек сұрады:

«Бізге көмектесіңіздерші. Бізді алып кетіңіздерші. Қой жайғызады. Қой аз болып қалса да бізден көреді...», — деді бала көгерген жерлерін көрсеткен соң. 

Orda.kz тілшісі ағайынды балалар Талас ауданына қарасты Көктал ауылында тұрғанын анықтады. Олар 6 тамыз күні кешкісін үйден қашып кетіп, Алматыда табылған. Балалар тұрған отбасы бұрын есепте тұрмаған. Істің мән-жайын полиция тексеріп жатыр.