Жамбыл облысында жанармайды заңсыз әкету схемасы әшкереленді

Жамбыл облысында полиция жанар-жағармай материалдарын елден заңсыз шығарғандардың жолын кесті, деп хабарлайды Orda.kz.

Ішкі істер министрлігі жанармайды заңсыз тасымалдауға қарсы жедел-профилактикалық іс-шараларды тұрақты түрде жүргізіп келеді. Соның нәтижесінде Қордай ауданында бірқатар азаматтардың көліктерді заңсыз қайта жабдықтап, қосымша жанармай бактарын орнатқаны анықталған.

Бұл тәсіл арқылы отын көлемі жасанды түрде көбейтіліп, кейін оны елден заңсыз шығарып, қайта сату көзделген. Жыл басынан бері өңірде осындай 300-ден астам құқық бұзушылық фактісі тоқтатылған.

Барлық заң бұзушылықтар дер кезінде анықталып, кінәлі жүргізушілер жауапкершілікке тартылған. Олардың көліктерінің мемлекеттік тіркеу нөмірлері алынып, анықталған кемшіліктер толық жойылғанға дейін автокөліктер арнайы айып тұрақтарына қойылған.

Тексеру барысында заңсыз орнатылған құрылғылар мәжбүрлі түрде алынып тасталады. Сонымен қатар көліктерді заңсыз қайта жабдықтағаны және тиісті тіркеусіз қызмет көрсеткені үшін техникалық қызмет көрсету станцияларының иелері де әкімшілік жауапкершілікке тартылып жатыр.

Оқи отырыңыз:

• Блогер Қайсар Камза қамауға алынғаны туралы ақпараттан кейін Вьетнамнан видео жариялады
• Польша Қазақстанның әскери атташесі Ануар Бәкібайды босатты