Жамбыл облысында пара алды деген күдікпен полиция бөлімі бастығының орынбасары ұсталды

Жамбыл облысы аумағында Байзақ аудандық полиция бөлімі бастығының орынбасары пара алды деген күдікпен ұсталды. Бұл туралы Orda.kz жергілікті тілшісі хабарлады.

Алдын ала мәліметтерге сәйкес, 31 шілде күні сағат 19:00 шамасында жедел-іздестіру шаралары мен жасырын тергеу әрекеттері барысында Жамбыл облыстық полиция департаменті Байзақ аудандық полиция бөлімінің бастығының орынбасары, полиция подполковнигі Талғат Сәрсенов ұсталған.

Тергеу нұсқасына сәйкес, ол адвокат арқылы Тараз қаласы тұрғынынан қылмыстық істі рақымшылыққа байланысты тоқтату үшін 300 мың теңге алған.

Арнайы операцияны бейінді бөлім қызметкерлері Ұлттық қауіпсіздік комитеті Жамбыл облысы бойынша департаментімен және өңірлік полиция департаментінің ішкі қауіпсіздік басқармасымен бірлесіп жүргізген.

Тінту барысында берілген ақша күдіктінің қызметтік көлігінен табылған.

Қазіргі уақытта алғашқы тергеу амалдары жүргізілуде.

Оқи отырыңыз:

• Есіл өзенінде 20 жастағы жігіт қаза тапты: Денесі әлі іздестіріліп жатыр
• Future Games: Қазақстан намысын жалғыз команда қорғайтын болды