«Жалған құрылыс компаниясын құрған»: Конкурстың 12 жеңімпазы күдікке ілінді

Шымкентте мемлекеттік сатып алу конкурстарының 12 жеңімпазы күдікке ілінді, деп хабарлайды Orda.kz. 

Сыбайлас жемқорлыққа қарсы қызмет өкілдерінің мәліметінше, олар жалған құжат жасап, құрылыс компанияларын құрған. Кейін сатып алым сайтының автоматтандырылған рейтингтік көрсеткішіне әсер етіп, мол тәжірибесі бар екенін дәлелдей алған. Бірақ зерттеу барысында күдіктілердің бұған дейін ешқандай құрылысқа қатысы болмағаны анықталды.

Бюджетке жалпы сомасы 21 миллиард теңге шығын келтірілді. Осыған қатысты антикор атынан мемлекеттік органдарға нұсқау жолданды. 

«Олар бұған дейін атқарған жұмыстары туралы жалған құжаттама ұсынған. Қазір бұл мәселелер орталық аппаратта қарастырылып жатыр. Ал нормативтік құқықтық акт әзірлеген орган ретінде Қаржы министрлігіне ұсыныс жолданды. Олар жағдайды реттейді», - дейді қалалық СЖҚІҚ департаменті басшысының бірінші орынбасары Алексей Колосков.