Зеленский Тomahawk зымырандарын сұрады, Трамп бас тартты

Украина Президенті Владимир Зеленский Нью-Йоркте өткен БҰҰ Бас Ассамблеясы барысында Дональд Трамппен өткен жабық кездесуі кезінде ұзақ қашықтыққа ұшатын Tomahawk қанатты зымырандарын беруді сұрады, деп хабарлайды Orda.kz The Telegraph-қа сілтеме жасап.

Кездесу барысында украин көшбасшысы мыңдаған шақырым қашықтыққа ұша алатын бұл зымырандар «Владимир Путинді келіссөз үстеліне отыруға көндіре алады» деп атап өтті.

Кейінірек Axios басылымына берген сұхбатында Зеленский Америка тарапынан жаңа қару жүйесін сұрағанын растады. Оның айтуынша, бұл жүйе Мәскеуді бейбіт жолмен реттеу нұсқаларын қарастыруға мәжбүр етер еді. Алайда нақты қандай жүйе екенін ол нақтыламады.

Украина президентінің айтуынша, Трамп оған:

«Біз бұл мәселе бойынша жұмыс істейміз», - деп жауап берген.

Алайда The Telegraph еске салғандай, АҚШ-тың алдыңғы әкімшілігі кезінде де Киевтің Tomahawk зымырандарына қатысты өтініштері қанағаттандырылмаған болатын. Ол кезде Джо Байден бұл зымырандарды жеткізуді тым қауіпті деп бағалады, өйткені олар Мәскеудегі нысаналарды да соққыға ала алады және Ресейдің қазіргі әуе шабуылына қарсы қорғаныс жүйелерін айналып өте алады.

Кейін белгілі болғандай, Трамп Украина тарапынан берілген қару-жараққа қатысты көптеген ұсыныстарды талқылауға дайын болғанымен, Tomahawk зымырандарын беруге қарсы болған. Тіпті бұл ұсыныс НАТО елдері тарапынан одақтас ретінде берілуі мүмкін болса да, ол оған келіспеген. Axios-тың хабарлауынша, бұл  Трамптың келіспеген жалғыз тармағы болған.

Сонымен қатар, АҚШ-тың Мемлекеттік хатшысы Марко Рубио еуропалық әріптестеріне Трамптың Украинаға қатысты ұстанымындағы өзгерісті «максималды жағымды белгі»  ретінде қабылдау керек екенін жеткізді. Оның айтуынша, Ақ үй басшысы Путиннің соғысты аяқтауға бағытталған әрекеттеріне жауап бермегеніне қатты ашулы.

Еске салайық, Нью-Йорктегі Зеленскиймен кездесуден кейін Трамп Еуроодақ пен НАТО-ның қолдауымен Украина өз территориясының барлығын қайтарып ала алады деп мәлімдеді. Ол мұндай қорытындыға Украинаның Ресейге туындатып отырған экономикалық қиындықтарын көрген соң келген сыңайлы.

Жақында Fox News-ке берген сұхбатында Украина президенті Путинмен Қазақстанда кездесуге дайын екенін  мәлімдеді. 

Сонымен қатар, АҚШ президенті Дональд Трамп Ресей көшбасшысы Владимир Путинге қатысты төзімінің таусылуға жақын екенін айтып, «Сабырым сарқылса қатаң әрекет етуге мәжбүр боламыз» деген болатын.