Зеленский: Ресей жаңа «шабуылдың бес сценарийін» дайындап жатыр

Украина президенті Владимир Зеленский Ресей Украинаның солтүстігі арқылы соғысты кеңейтудің бес сценарийін қарастырып отырғанын мәлімдеді. Киев бұл қауіпке жауап ретінде қарсы шаралар дайындап жатыр екен, деп хабарлайды Orda.kz.       

Бұл туралы Зеленский барлау деректері талқыланған Ставка отырысынан кейін айтты. Оның сөзінше, Ресей Чернигов–Киев бағытында шабуыл әрекеттерінің бірнеше нұсқасын қарастыруда.

Зеленскийдің айтуынша, сөз солтүстік бағытқа қатысты бес түрлі сценарий туралы болып отыр. Украина билігі олардың ешқайсысының жүзеге асуына жол бермеу үшін қорғанысты күшейтуді жоспарлап отыр.

«Украина міндетті түрде өзін қорғайды. Қазіргі міндетіміз – мемлекетімізді күшейтіп, Ресейдің Украинаның солтүстігі арқылы соғысты кеңейтудің бес сценарийінің ешқайсысы іске аспайтындай ету», – деді ол.

Зеленский бұл бағыттағы украин әскерлері күшейтілетінін хабарлады.

Бұдан бөлек ол сыртқы істер министрлігіне Беларуське қатысты қосымша дипломатиялық қысым шараларын дайындауды тапсырды. Оның айтуынша, Ресей бұл елдің аумағын әскери әрекеттерді кеңейту үшін пайдалануы мүмкін.

Сонымен қатар Зеленскийдің айтуынша, Украина барлау қызметтеріне де жекелеген міндеттер жүктелген.

Оқи отырыңыз:

• Трамп Ресей мен Украина арасында үш күндік бітім жариялады
• Украина Ресейдің мұнай инфрақұрылымына ауқымды соққы жасады
• Еуроодақ Украинаға 90 миллиард еуро несие беретін болды