«Зардап шеккендер бар»: Астанада жолаушылар автобусы бағанаға соғылды

Астанада автобус Республика даңғылы маңындағы бағанаға соғылды. Зардап шеккендер бар, деп хабарлайды Orda.kz. 

Әлеуметтік желіде тараған бейнежазбадан жолаушылар автобусының алдыңғы әйнегі шағылып кеткенін көруге болады. Бейресми ақпарат бойынша, жүргізуші айналғанда рөлге ие бола алмай, жарық бағанасына соғылған. Оқиға болған жерге жедел жәрдем бригадалары келіп, іске кірісті. Зардап шеккендерге барлық қажетті медициналық көмек көрсетіліп жатыр.

Зардап шеккендер туралы ресми ақпарат жоқ. Сонымен қатар нақты не болғаны әлі белгісіз. Астана қаласының денсаулық сақтау басқармасы зардап шеккендер туралы ақпаратты кейінірек хабарлайтынын мәлімдеді. 

Денсаулық сақтау басқармасы жол апатында 10 адамның зардап шеккенін хабарлады. Олардың бірі ауыр жағдайда, дәрігерлер жедел отаға кірісті. 

Ал қалған зардап шеккендер қаланың түрлі ауруханаларына жеткізілді. Олардың екеуі Ұлттық шұғыл медицина үйлестіру орталығында ем алып жатыр.

Жол апатына байланысты қылмыстық іс қозғалды. Полиция тергеу амалдары басталғанын мәлімдеді. 

Айта кетейік, ақпан айында Астанада №70 бағыттағы автобуста болған жол апаты салдарынан 15 адам зардап шекті.