Заңсыз жүрген Шри-Ланка азаматтары Қазақстаннан шығарылды

Шри-Ланка елінің төрт азаматы иммиграциялық заңнаманы бұзғаны үшін елден шығарылды.

Жас шри-ланкалықтар Орал стансасындағы  жедел іздестіру шаралары  кезінде табылды. Ер адамдар үшін Қазақстанда болу мерзімі әлдеқашан аяқталған, бірақ олар елден кетуге асығар емес.

— Орал қаласының әкімшілік құқық бұзушылық істер жөніндегі мамандандырылған ауданаралық сотының қаулысымен құқық бұзушылар 5 жыл мерзімге Қазақстан Республикасы аумағына келуге тыйым салу арқылы Қазақстан Республикасының шегінен шығару түріндегі жауапкершілікке тартылды, - деп хабарлады Көліктегі полиция басқармасы бастығының бірінші орынбасары Мадияр Айтуғанов.

Оның айтуынша, «Құқықтық тәртіп» жедел-профилактикалық іс-шарасының небәрі үш күнінде көлік полицейлері ізін суытпай 11 қылмыстың ізін  ашты. Сондай-ақ 1000-нан астам әкімшілік құқық бұзушылық анықталды, оның ішінде 40-ы ұсақ бұзақылық, 200-і қоғамдық орындарда алкогольдік ішімдіктерді ішу, 51-і шетелдік немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзуы тіркелді.