Үндістан Ресей мұнайын сатып алмауға уәде берді, Трамп оларға баж салығын төмендетті

Ләззат Сұңқар
cover Фото: aa.com.tr

Үндістанның Ресей мұнайын сатып алмауға берген уәдесіне орай Трамп оларға баж салығын төмендетті, деп хабарлайды Orda.kz.      

Үндістаннан импортталатын тауарларға қатысты жаңартылған тарифтер бүгін, 7 ақпанда күшіне енеді. АҚШ президенті Дональд Трамп Үндістан Ресей мұнайын сатып алудан бас тартуға міндеттеме алғаннан кейін бұл елден келетін тауарларға салынған қосымша 25 пайыздық баж салығын алып тастады.

«Үндістан Ресей мұнайын тікелей немесе жанама түрде импорттауды тоқтатуға міндеттеніп, оның орнына америкалық энергетикалық өнімдерді сатып алатынын мәлімдеді. Сондай-ақ АҚШ-пен қорғаныс саласындағы ынтымақтастықты 10 жылға кеңейту жөнінде негіздемелік келісім жасасты» деп жазады Bloomberg құжатқа сілтеме жасап. 

АҚШ пен Үндістан өзара тиімді сауда туралы негіздемелік келісімге қол қойғаны белгілі болды. Келісімге сәйкес, Нью-Дели америкалық барлық өнеркәсіптік тауарларға қатысты баж салығын жояды немесе төмендетеді, ал Вашингтон үндістандық кейбір ұшақтар мен авиациялық бөлшектерге салынған баж салығын алып тастайды. 

Сонымен қатар Үндістан алдағы бес жыл ішінде АҚШ-тан жалпы құны 500 млрд доллар болатын энергетикалық тауарларды, ұшақтар мен авиациялық бөлшектерді, асыл металдарды, технологиялық өнімдерді және кокс көмірін сатып алуға міндеттеме алды.

Үндістан импортына қатысты жаңартылған тарифтер Вашингтон уақытымен 7 ақпан күні сағат 00:01-ден бастап (Астана уақытымен 10:01-де) қолданысқа енгізіледі. Қосымша баж салығы алынғаннан кейін Үндістан тауарларына қатысты тариф мөлшері 18 пайыз болады.

Айта кетейік, АҚШ 2025 жылдың тамыз айында Үндістанның Ресей мұнайын сатып алуына байланысты бұл елден келетін тауарларға қосымша 25 пайыздық баж салығын енгізген болатын.

Оқи отырыңыз:



Жаңалықтар

барлық жаңалықтар

22.12.2020 жылы берілген
№KZ05VPY00030397 мерзімді баспасөз басылым және ақпараттық агенттік
тіркеу туралы куәлік.

© ORDA, . Пайдалану ережелері