Wildberries қоймаларын Қазақстанға көшіретіні туралы ақпарат рас па?

Ресейлік БАҚ Украинадағы шабуылдарға байланысты Wildberries компаниясы өз қоймаларын Қазақстанға көшіруі мүмкін екенін хабарлады. Алайда Қазақстан билігі бұл туралы ресми өтініш түспегенін мәлімдеді, деп хабарлайды Orda.kz.        

DW-нің Астанадағы жоғары лауазымды саяси дереккөзі бұл нұсқа әзірге тек болжам ретінде қарастырылып отырғанын, себебі оның тауар бағасының қымбаттауына әкелетіні анық екенін айтқан.

«Қазақстандағы қоймалардан Ресейдің еуропалық бөлігіндегі тұтынушыларға тауар жеткізу қашықтықты бірнеше есе ұзартады. Екі елде де халықтың сатып алу қабілеті төмендеп жатқан жағдайда бұл тауарлардың қымбаттауына және сатылым көлемінің азаюына әкеледі»  депті DW сұхбаттасы. 

Оның айтуынша, қазіргі таңда Қазақстанда көлемі 100 мың шаршы метрден асатын бос қойма жоқ. Сонымен қатар, негізгі қойма инфрақұрылымы Алматы, Астана, Шымкент және Қарағанды сияқты ірі қалалардың маңында шоғырланған. Ал Ресеймен шекаралас Орал, Ақтөбе, Қостанай, Петропавл қалаларында мұндай нысандар іс жүзінде жоқ.

Сондай-ақ дереккөз Wildberries тауарлары Қазақстан аумағы арқылы транзитпен өткен жағдайда, билік санкция талаптарының сақталуын қатаң бақылауда ұстайтынын айтты. Қос мақсатта қолданылуы мүмкін тауарларға жол берілмейді.

«Қазақстан мұндай тауарларды жеткізу үшін өз аумағын пайдалануға жол бермейді. Егер оларды қайта экспорттауға немесе Ресейге шығаруға әрекет жасалса, шекаралық бақылауға жататын жүктің бәрі міндетті түрде тоқтатылып, бұғатталады», – деп атап өткен ол. 

Ресейдегі қоймаларға жасалған дрон шабуылдарынан кейін Wildberries тәуекелдерді азайтып, сатушылар жұмысының тұрақтылығын қамтамасыз ету үшін тауарларды әртүрлі логистикалық орталықтар арасында қайта бөлуге кірісті.

Бұған дейін Ресейдегі қоймалардың бүлінуінен қазақстандық кәсіпкерлердің де зардап шеккені айтылған болатын. Алдын ала есеп бойынша олардың шығыны 1 миллиард теңгеден асып кеткен.

Еске салсақ, біз былтыр Wildberries маркетплейсінде кәсіп жүргізуді үйретемін деп уәде берген, елге танымал блогердің соңынан ерген 30 шақты кәсіпкер не ақшасын, не тауарын ала алмай жүргенін жазған едік. 

Монымен қатар Wildberries компаниясының иесі Татьяна Кимнің күйеуі Владислав Бакальчук Қырғызстан азаматтығын алған еді.

Оқи отырыңыз:

• Wildberries патшайымы: Блогерге алданған қара халық президентке үндеу жолдады
• Wildberries иесінің ажырасқан күйеуі Қырғызстан азаматы атанды
• СІМ: Ресейлік Wildberries Қазақстанда 30 жылға салықтан босатуды талап етті