СІМ: Ресейлік Wildberries Қазақстанда 30 жылға салықтан босатуды талап етті

Ресейлік Wildberries интернет-дүкені Қазақстанда жұмыс істеу үшін 30 жылға салықтан босатуды талап етті, деп хабарлады Қазақстан сыртқы істер министрінің орынбасары Алмас Айдаров.

Сондай-ақ компания қоймалар салуға көмек көрсетуді де  талап еткен.

Орталық коммуникациялар қызметінде өткен брифингте вице-министр қазақстандық тарап компанияның бас кеңселерімен елде өз филиалдарын ашу үшін тікелей келіссөздер жүргізіп жатқанын баса айтты. Дегенмен, оның айтуынша, қандай да бір брендтің келуі Қазақстан үшін әрқашан тиімді немесе басымдық бола бермейді.

— Біз келіспейтін шарттарды талап ететін брендтер бар. Мысалы, Wildberries, біз олармен бірнеше жыл бойы әртүрлі деңгейде келіссөздер жүргізіп келеміз, олар түрлі пікір айтады. Бірақ  алғашқы келіссөздерде  Wildberries 30 жылға салықтан босатуды, сонымен қатар қоймалар салуға көмектесуді талап етті. Әрине, біз мұндай шарттарға келіспедік. Біз: жалпы шарттармен жұмыс істеу керек деп айтамыз. Неге біз оларға тегін қоймалар саламыз? 30 жыл бойы шетелдік компанияны салықтан босатамыз? Ал біздің басқа отандық компаниялар ше? – дейді  Алмас Айдаров.

Вице-министрдің айтуынша, осы себепті Wildberries  компаниясының Қазақстанда ірі қоймалары жоқ.

Дәл осындай жағдай IKEA жиһаздарын сататын голландиялық компанияда да бар, деп қосты Алмас Айдаров. Компания қазақстандық нарықты бірнеше рет қарастырған, бірақ Ресейдегі активтерінен бас тарту туралы әлі шешім қабылдаған жоқ, өйткені ол жақта көптеген алаңдарды  сатып алған.