Жәнібек Әлімханұлы допинг қолданды деген күдікке ілінді

Қазақстандық кәсіпқой боксшы Жәнібек Әлімханұлы допинг қолданды деген күдікке ілінді, деп хабарлайды Orda.kz.

Жәнібек Әлімханұлы 7 желтоқсан күнгі жекпе-жек алдында допинг тестінен өте алмады. Дүниежүзілік бокс ұйымы допингке қарсы қауымдастықтан орта салмақтағы чемпион Жәнібек Әлімханұлының талдау нәтижесі дұрыс болмай шыққаны жөнінде мәлімет келгенін хабарлады. 

Ал Жәнібек Әлімханұлы допинг-тестке қатысты өз ойын айтып, өзінің таза спортты қолдайтынын ашық айтты. Оның айтуынша, бірінші тест бәрін таза деп көрсеткен. Қазір екінші тестке қатысты жауапты күтіп отыр.

«Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып, таңғалып отырмын. VADA бірінші рет анализ алып, бәрі таза деп еді. Мен витаминдеріме де, тамағыма да ешқандай өзгеріс енгізбедім. Екінші  сараптамада неге бұлай болғанын түсінбей отырмын, біз қайта анализ тапсыруға өтініш айттық. Жауабын күтіп отырмыз» деп жазды боксшы желідегі парақшасында. 

WBO Жәнібек Әлімханұлының VADA тест сынамасынан тыйым салынған зат анықталғанын растап, ішкі тергеу жүргізіліп жатқанын мәлімдеді.