Ұшақ апатынан мерт болған ержүрек бортсерік туралы фильм түсіріледі

Әзірбайжанда Ақтау маңындағы ұшақ апаты кезінде жолаушыларға нұсқау беріп, сабыр сақтауға шақырған бортсерік Хёкюма Алиева туралы фильм түсіріледі, деп хабарлайды Orda.kz.

Әзірбайжанның еңбек сіңірген өнер қайраткері, режиссер, сценарист Зия Шихлинский жаңа фильм түсіруге дайындалып жатыр. 

Апаттан аман қалғандар дәл осы қыздың батылдығын атап өтіп, соңғы сәттерде тәртіп пен байсалдылық сақтау үшін барын салғанын айтқан еді. 

Хёкюма Алиева 1991 жылы Кяльбаджар ауданында дүниеге келген. Тұрмыста, баласы жоқ. Бортсеріктің анасы қызының ерлігін, батырлығын айтып, көзіне жас алды. Ал Хёкюма Алиеваны әкесі соңғы сапарға шығарып салған еді.

Еске салайық, апат 25 желтоқсан күні болды. AZAL әуе компаниясының Бакуден Грозныйға бағыт алған Embraer ұшағы Қазақстанның Ақтау қаласы маңында құлады. 38 адам қаза тауып, 29 адам жарақат алды. Әзірбайжан халқы 26 желтоқсан күнін апат құрбандарын еске алу үшін қаралы күн деп жариялады.