«Ұруға рұқсат берілді»: Тәліптер Ауғанстандағы әйелдердің құқығын тағы шектеді

Ауғанстанда «Талибан» билігі жаңа қылмыстық кодексті ресми түрде қабылдады. Бұл құжат құқық қорғау ұйымдары мен халықаралық қауымдастықтың қатаң сынына ұшырады, деп хабарлайды Orda.kz The Sunday Guardian басылымына сілтеп. 

Сарапшылар құжаттағы бірқатар баптар тұрмыстық зорлық-зомбылықты заңдастырып, әйелдер мен балалардың негізгі құқықтарын айтарлықтай шектейтінін ескертті.

Әсіресе ерлі-зайыптылар арасындағы зорлық-зомбылық мәселесіне арналған 32-бап үлкен наразылық тудырып отыр. Аталған бапқа сәйкес, әйелін ұрған күйеуі бар болғаны 15 тәулікке қамауға алынуы мүмкін. Бұл жаза әйел сотта зорлық-зомбылықты дәлелдей алған жағдайда ғана қолданылады. Яғни, сот әйелдің денесіндегі жарақат пен сынықтарды ғана есепке алады. 

Кодекс жеке адам құқықтарынан гөрі патриархалды жүйені және идеологиялық қысымды жоғары қояды. Ол әйелдердің  жүріп-тұруын, қарым-қатынасын, отбасылық шешімдерін және жеке сенімдерін қатаң реттейді. 

Сондай-ақ, діннен «бас тартқандарға» қатысты да аса қатал шаралар көзделген. 58-бапқа сәйкес, ислам дінінен бас тартқан әйелдер өмір бойына бас бостандығынан айырылып, тәубеге келіп, исламға қайта оралғанға дейін әр үш күн сайын 10 рет дүре соғу жазасына кесілуі мүмкін. Ал ер адамдарға қатысты өзге тәртіп қолданылады. Ханафи құқық нормалары бойынша оларға тәубеге келу үшін үш күнге дейін уақыт беріледі, содан кейін өлім жазасы қолданылуы мүмкін. Құқық қорғаушылар мұны заңдағы ер мен әйел арасындағы айқын кемсітушілік деп бағалайды.

Оқи отырыңыз:

• Қазақпын деп танысып, жәрдемақы алып келген ауғанстандық жазаланды
• Тәліптер Ауғанстанда желіні толығымен өшірді