Ұрланған жәдігер көп жылдардан кейін Мысырға қайтарылды

Нидерланд билігі жасы шамамен үш жарым мың жыл болатын көне мысырлық шенеуніктің тас мүсінінің басын Мысырға тапсырды. Бұл артефакт «араб көктемі» оқиғалары кезінде елден заңсыз шығарылып, кейін өнер нарығында сатылмақ болған. Бұл туралы  Orda.kz Ahram басылымына сілтеме жасап хабарлайды.

Мүсін ресми түрде Гаагадағы Мысыр елшісіне табысталды. Табылған жәдігер перғауын Тутмос III дәуіріне жататын мүсіннің бір бөлігі болып шықты. Мұндай мүсіндер әдетте ғибадатханалар мен қабірлерге орнатылған.

Оқиғаның мән-жайы 2022 жылы Маастрихт қаласында өткен өнер жәрмеңкесінде белгілі болды. Сарапшылар бюстің шығу тегіне күмән келтіріп, Британ музейіне жүгінген. Осыдан кейін полиция тексеріс жүргізіп, жәдігерге қатысты құжаттардың қолдан жасалғанын және артефакттың Луксор қаласынан ұрланғанын анықтады.

Мысыр билігі тарихи құндылықты қайтаруды талап етіп, Нидерланд тарапы бұл талаппен келісті.

«Бұл зат өнер нарығында болмауы тиіс. Оның орны — Мысырда», — деді Нидерланд мәдениет министрі Гуке Моэс жәдігерді тапсыру рәсімі кезінде. 

Айта кетейік, бұған дейін де Каир Еуропадан көне мұраларын қайтарып алған. 2025 жылдың тамызында Германия мен Ұлыбритания Мысырға жерлеу стелаларынан бастап, ғұрыптық бетперделер мен тұмарларға дейінгі 13 артефакт тапсырған болатын.

Ал 2025 жылдың қараша айында Мысырда мәдени орталық ашылып, ол бірден «ғасыр мұражайы» атанды. Оның аумағы Луврдан екі есе үлкен, шамамен 70 футбол алаңына тең. Мұнда 100 мыңға жуық жәдігер қойылған, оның ішінде Тутанхамон қабірінен табылған, бұрын көпшілікке көрсетілмеген қазыналар да бар.

Оқи отырыңыз:

• «Жаңа Алакөл»: Курорттың бас жоспары Түркия мен Мысыр стандарттары бойынша әзірленеді
• Иран аспаны қауіпті: Air Astana мен FlyArystan Дубай мен Мысыр бағыттарын өзгертті
• Дубайдағы жаппай төбелес: сегіз өзбекстандық өмір бойына бас бостандығынан айырылды
• СІМ Мысырда қаза тапқан және зардап шеккен қазақстандықтар туралы ақпаратты растады