СІМ Мысырда қаза тапқан және зардап шеккен қазақстандықтар туралы ақпаратты растады

Сыртқы істер министрлігі Мысырда қаза тапқан және зардап шеккен қазақстандықтар туралы ақпаратты растады, деп хабарлайды Orda.kz.       

«Кеше Шарм-эль-Шейх әуежайында рейске қонуды күтіп отырған жолаушылардың ұшу аймағында жарнамалық тақта құлады. Осы жазатайым оқиға салдарынан Қазақстан азаматы қаза тауып, тағы екі отандасымыз жеңіл жарақат алды» деп хабарлады Қазақстан СІМ ресми өкілі Айбек Смадияров. 

Ол қайтыс болған адамның туыстарымен байланыс орнатылғанын және консул оларға барлық мәселелер бойынша көмектесетінін айтты.

«Зардап шеккен екі әйелге қажетті медициналық көмек көрсетілді, олардың денсаулығына ешқандай қауіп төніп тұрған жоқ. Мысыр тарапы Қазақстан азаматының қайғылы қазаға ұшырауына байланысты шын жүректен көңіл айтады. Мысырдың азаматтық авиация министрі бұл оқиғаны өзінің жеке бақылауына алып, дереу оқиға орнына комиссия жіберді. Қазір оқиға орнында тергеу шаралары жүргізілуде. ҚР Елшілігі де осы оқиғаны ерекше бақылауға алды», - деп қосты Смадияров. 

Бұған дейін Мысырдағы Шарм-еш-Шейх әуежайында Қазақстан азаматының қаза болғаны туралы ресейлік Mash басылымына сілтеме жасап Orda.kz  хабарлаған болатын.