Украинаға келген НАТО-ның жаңа бас хатшысы Марк Рютте Зеленскиймен кездесті  

Нидерландтың бұрынғы премьер-министрі 1 қазанда НАТО-ның бас хатшысы қызметіне кірісті. Ал екі күннен кейін Киевке барды, деп хабарлайды Orda.kz.  

УНИАН ақпарат агенттігінің мәліметтеріне сүйенсек, Марк Рютте президент Владимир Зеленскиймен кездесуде Украина елінің Солтүстік Атлантикалық альянсқа қосылу мәселесін талқылады. Президент Украина НАТО-ның 33-ші мүшесі бола алатынын атап өтті.  

«Бұл өте маңызды қадам. Бұл мақсатқа жету қиын. Бірақ біз осы мақсатқа қол жеткізуге бар күшімізді саламыз», — деді Владимир Зеленский.

Екінші маңызды мәселе ретінде Зеленский елді қару-жарақпен қамтамасыз ету жайын атады. Бұл мәселе 9–11 шілдеде өткен НАТО саммитінде шешілген болатын.

«Ең алдымен, әңгіме Patriot және STAMP-T әуе шабуылына қарсы қорғаныс жүйелері жайлы болып отыр. Біз саммитте уәде етілген және қосымша жүйелерді алу уақытын жақындатқалы жатырмыз», — деп атап өтті Владимир Зеленский. 

Зеленскийдің пікірінше, НАТО-ның жаңа бас хатшысының Украинаға жасаған сапары альянстың бұл елге дос әрі одақтас ретінде ерекше мән беріп отырғанын көрсетеді. Айта кетсек, Марк Рютте Украинаға бесінші рет келіп отыр. 2022 жылы басталған Ресей-Украина соғысынан бері ол Харьков, Одесса және Киевке төрт рет сапар жасаған. 

Еске сала кетсек, Orda.kz НАТО-ның бас хатшысы ауысқаны жайлы жазған болатын.